Ndarja në partinë qeverisëse në Greqi, Syriza po zgjerohet ndërsa vendi afrohet drejt zgjedhjeve parlamentare në muajin shtator.
Mbrëmjen e vonë të së mërkurës, 53 anëtarë të komitetit qendror të partisë dhanë dorëheqjen, duke e njoftuar vendimin e tyre me anë të një letre për Cipras.
Ata i përkasin grupit të ashtuquajtur G53, një fraksion i lindur në vitin 2014 dhe që shihet si më pak radikal sesa linja e ashpër e Platformës së Majtë.
Disa prej tyre janë bashkuar me partinë e formuar nga ish-ministri I Energjisë, Panagiotis Lafazanis dhe ka deklaruar kundërshtinë me kushtet që shoqërojnë paketën e shpëtimit financiar për Greqinë.
Partia e re, krijuar të premten e kaluar, ka 25 deputetë në parlament.
Ndërkohë, kryeministri Cipras në një intervistë me televizionin grek, Alpha tha se nëse nuk arrin shumicën qeverisëse në zgjedhje, nuk do bashkëpunojë me partitë që kanë qeverisur Greqinë më parë. “Nuk do të bashkëpunojmë me sistemin e vjetër”, tha ai.
Kryeministri mbetet politikani më popullor në Greqi me sondazhet që e nxjerrin në kuotën e 61 për qind.
Analistët thonë se Cipras do t’i fitojë zgjedhjet e shtatorit me partinë e tij Syriza, mirëpo nuk do të ketë atë shumicë të fortë që ka pasur më parë, duke e bërë të vështirë zbatimin e reformave që kërkojnë kreditorët.
Pyetja që mban pezull publikun grek, por sidomos kreditorët ndërkombëtarë të Greqisë është nëse Syriza do të jetë në gjendje të marrë aq mbështetje sa të miratojë në parlament masat ekonomike të parashikuara në paketën e shpëtimit financiar. /tesheshi.com/
