Kriza e bankave në Greqi nuk ka sjellë vetëm panik dhe alarm tek qytetarët, por ka rritur pagesat online dhe përdorimin e kartave të kreditit, duke reduktuar përdorimin e parave cash.
Kontrolli i kapitaleve, një lëvizje e detyruar e Qeverisë për shkak të mungesës së marrëveshjes me kreditorët ndërkombëtarë ka bërë që bankat të mbyllen, ndërsa flitet shpesh e më shpesh se grekët duhet të mësohen shpejt me transaksione virtuale në jetën e tyre të përditshme.
Pagesat me karta vlerësohet se janë rritur me 130 për qind që kur bankat u mbyllën në 29 korrik pasi një pjesë e madhe e qytetarëve kanë nisur të përdorin karta krediti dhe debiti për blerjet e tyre në supermarket, stacionet e karburantit dhe dyqane të tjera, për të mbuluar nevojat e përditshme.
Dukshëm në rritje, bankat kanë lëshuar më shumë se 500 mijë karta debiti brenda pak ditësh, që do të thotë se virtualisht të gjithë qytetarët që kanë llogari bankare në Greqi posedojnë edhe kartat përkatëse për të përdorur paratë e tyre.
Të dhëna nga bankat, si raporton Ekathimerini, theksojnë faktin se kanë lëshuar 40 mijë kode të reja të bankimit online, ndërsa shumë përdorues janë qenë jo aktivë deri së fundmi, kur kriza i ka bërë të nxitojnë të riaktivizojnë llogaritë e tyre online. /tesheshi/
