Ka shkaktuar një furtunë të vërtetë një status allasoj i ish-të dërguarit amerikan Grenell, tipike të guximshme prej tij, ku si asnjë ndërkombëtar më parë, aq më pak amerikane, ka nderuar Vidovdanin serb, përkujtimin pra të serbëve të betejës së Fushë Kosovës, që është dhe një mit i tyre historik, në bazë të të cilit pretendojnë se Kosova është e tyre.
“Sot nderojmë heronjtë e Vidovdan. Në këtë ditë në 1389, filloi beteja kundër Osmanëve në Kosovë. Sot është një ditë përkujtimore për Shën Princin Llazar dhe dëshmorët e shenjtë serbë”, shkruan Grenell.
Të forta kanë qenë reagimet, por aq sa duhej nga politika zyrtare e Kosovës, apo në përgjithësi klasa politike e Kosovës.
Gjithsesi, ish-ambasadorja në SHBA Vlora Çitaku, ka qenë më kurajozja në këtë drejtim.
“Nuk ishte betejë e serbëve; ishte ushtria e Ballkanit që luftoi kundër pushtuesit osman. Kjo betejë u bë miti themelor që vazhdon të ushqejë nacionalizmin serb që nga shekulli i 19-të duke na mbajtur të gjithëve peng”, shkroi Çitaku, ku sigurisht, e njohur për qëndrimet e saj me theks anti-osman, e ka reflektuar këtë në zgjedhjen e termit “pushtim”, ndërkohë që një linjë e mendimit historiografik i mëshon nocionit “sundim”.
I është përgjigjur Grenell me fjalët: “Ju ofendoheni së tepërmi. Duhet të jetë rraskapitëse gjetja e një inati në gjithçka. Njerëzit duan punë dhe zgjidhje –iu zgjasni dorën”, shkruan diplomati amerikan. /tesheshi.com/
