I Dërguari i Presidentit Trump për Dialogun, Richard Grenell lëshoi kritika ndaj atyre ende mbajnë në fuqi taksën ndaj Serbisë, duke nënkuptuar kryeministrin në ikje Ramush Haradinaj. Pasi një dite të ethshme në Prishtinë, Grenell udhëtoi drejt Beogradit, ku atje u tha gazetarëve që dhe fushata serbe e ç’njohjeve duhet të ndalet.
“Janë gjëra që edhe njerëzit nga fusha e biznesit e dinë se duhet të ndodhin. Qytetarët e zakonshëm e dinë se duhet të ndodh, por disa politikanë janë robëruar në mënyrën e vjetër të menduarit dhe dëshirojnë të grinden për gjithçka. Ekziston një hapësirë shumë e vogël dhe SHBA-të do të koncentrohen që ta zgjidhin, por do të insistoj që edhe Serbia të ndalet me lobimin e saj. Mendoj se jemi afër që të ndodhë një gjë e tillë. Njerëzit duan të ecin përpara, të shikojnë para dhe të tejkalojnë të kaluarën”, tha Grenell sapo mbërriti në kryeqytetin serb.
Sakaq, ai përcolli mesazhin se marrëveshja duhet të ndodhë shpejt, padyshim, me rikthimin e shpejtë të Dialogut të ngecur për shkak të taksës, duke theksuar se Presidenti Trump nuk do që kjo gjë të vonojë më tej.
“Fakti që jemi koncentruar në këtë çështje, ndjej energjinë që mund të vijmë deri të zgjidhja, por më duhet të them se shumë pak kohë kemi për këtë, presidenti Trump nuk dëshiron të humb kohë dhe nuk do të lejoj që zgjedhja të zgjatë shumë nëse nuk ka përparim. Shpresoj që Serbia dhe Kosova ta shfrytëzojnë mundësinë që tani e kanë”, tha Grenell. /tesheshi.com/
