Shkurt e qartë, i dërguari Grenell i ka përcjellë një tjetër mesazh qeverisë së re të Kosovës që të heqë taksën doganore 100 përqind ndaj Serbisë. Sipas tij, jo për të fituar Serbia por për të fituar vetë Kosova në radhë të parë.
“Taksa duhet të hiqet në mënyrë që investimet të zhvillohen. Është bazike”, shkroi i përzgjëdhuri nga Trump për të çuar Prishtinën e Beogradin sërish në dialog, deri në arritjen e një marrëveshjeje me vlerë historike mes tyre.
Krahas statusit të tij, Grenell ripostoi statusin e Koordinatorit në Zyrën për Sfidat e Mijëvjeçarit, Petrit Selimi, i cili ka kumtuar investime amerikane për Kosovën.
“Investime të mëtutjeshme në Kosovë nga @MCCgov planifikuar në buxhetin e Donald Trump. Marrëveshja kompakte pritet të sigurojë një nxitje të madhe për infrastrukturën energjetike dhe të mundësojë partneritete publiko-private që sjellin rritje ekonomike në Kosovë”, është mesazhi i Selimit, përcjellë nga Grenell, si një argument se pse duhet hequr taksa. /tesheshi.com/
