I Dërguari i Presidentit Trump për Dialogun, Richard Grenell, nisi në Prishtinë betejën e tij për heqjen e takës 100 përqind ndaj produkteve serbe, ashtu siç kishte paralajmëruar. E vënë nga qeveria Haradinaj, i cili tashmë është në ikje, dhe, në pritje për t’u pasuar nga Albin Kurti, Grenell takoi këtë të fundit e më pas e bëri të qartë se heqja e taksës është dhe një premisë për zhvillim ekonomik.
“Ajo që dua ta bëj shumë të qartë është se shtytja ekonomike që po tentoj ta bëj është gjëja më e rëndësishme, të krijojmë vende pune, të tentojmë të sjellim biznesmenët nga Evropa dhe Amerika. Njerëzit janë të uritur të vijnë këtu dhe të ndihmoj të rritet ekonomia.
Administrata e Trumpit ka arritur ta rris ekonominë e vet, duke e larguar qeverinë nga rruga, duke e bërë qeverinë që të ndihmojë në rritjen e bizneseve, për të bërë çdo ditë të njëjtën pyetje, se çfarë mund të bëjmë që të rrisim bizneset”
Shikoni prosperitetin në Amerikë…. Si t’u jepet të rinjve punë e shpresë. Ajo që kam dëgjuar nga bizneset amerikane është se duan të vijnë këtu por mendojnë se ka ende konflikt….”, tha Grenell para gazetarëve.
Sa për ngërçin e formimit të qeverisë së re, ai nuk qe kaq i shqetësuar aq sa për taksën.
“Edhe vende si Britania e Gjermania kanë pasur probleme me krijimin e koalicioneve për qeverisje”, tha Grenell. /tesheshi.com/
