Në një komunikim në distancë, i derguari i presidentit Trump për dialogun, ambasadori Richard Grenell, i ka bërë të qartë atij që sot është në opozitë, ish-kryekuvendarit Kadri Veseli, kreu i PDK-së, se SHBA kërkojnë heqjen e taksës 100 përqind.
”Kadri, Shtetet e Bashkuara po kërkojnë që Kosova të heqë tarifat 100%. Ajo dëmton Kosovën dhe ndjek bizneset larg krijimit të vendeve të punës. Albini ka të drejtë për këtë”, shprehet Grenell, duke dhënë të kuptuar se kjo do ndodhë shumë shpejt.
Siç e ka bërë të qartë kryeministri i i ri i Kosovës, ai do e zëvëndësojë taksën me reciprocitetin, një tezë që ngjan si një mënyrë dinjitoze për ta tërhequr taksën e vënë nga Haradinaj.
Po pse reagoi Grenell në këtë formë? Shkak qe ky status i Veselit:
“Taksa ndaj importeve serbe ka qenë vendim dinjitoz i shtetit tonë për t’iu kundërvënë sulmeve të njëpasnjëshme që Serbia ka bërë kundër Kosovës. Shpreh shqetësimin për ngutinë e tepruar të kryeministrit të ri për të përmbushur kërkesat e Serbisë dhe për të rehatuar Listën Serbe, e cila u largua nga qeveria e kaluar për shkak të taksës. Një qeveri ka rënë si pasojë e taksës, gjë që ka dobësuar për një kohë Kosovën. Prandaj, nuk duhet të ketë manovrime politike për këtë temë të ndjeshme, e cila rrezikon ta dëmtojë më tej vendin tonë. Qeveria e re duhet të mos të dorëzohet para Serbisë përpara sfidave dhe vendimeve të mëdha që e presin Kosovën”, shkroi Veseli.
E Grenell madje shkoi më tej, duke i kujtuar Veselit se ç’ka shkruar dy javë më parë.
”Ne i jemi mirënjohës Presidentit Trump për vëmendjen dhe kujdesin e vazhdueshëm që ai demonstron ndaj Kosovës. Ne e dimë që jemi në rrugën e duhur në çdo proces kur kemi mbështetjen e SHBA. Shumë faleminderit Ambasador Grenell”, ka shkruar Veseli gjatë janarit, sjellë në kujtesë nga Grenell. /tesheshi.com/
