Zemërimi ynë do të jetë i pandalshëm. Këtë premtim të popullit kundër masave të kursimit, këtë herë e ka në kurriz partia e radikalëve të majtë, Syriza që erdhi në pushtet me premtime populiste për të nxjerrë Greqinë nga kriza dhe varësia e kreditorëve ndërkombëtarë.
Shijen e zemërimit të popullit do të ndjejë qeveria e majtë me nisjen e grevës së përgjithshme që është shfaqja e parë e rezistencës masive ndaj politikave neoliberale që në fakt, populli ka zgjedhur vetë t’i ndjekë duke votuar në zgjedhje radikalët e Syriza-s.
Greqia pritet të ndalet e gjitha kur punonjësit si në sektorin privat ashtu dhe në atë publik të ulin veglat e punës për të protestuar kundër shkurtimit të mëtejshëm të shpenzimeve dhe rritjes së taksave. ”Dimri do të jetë shpërthyes dhe kjo grevë është vetëm fillimi”, thotë Grigoris Kalomoiris, një përfaqësues i unionit të punonjësve civilë, Adedy.
“Kur rroga mesatarare tashmë është shkurtuar me 30 për qind, kur rrogat janë që tani të papranueshme, kur sistemi i sigurimeve sociale është në rrezik kolapsi, ne nuk mund të qëndrojmë pa bërë asgjë”, thotë ai.
Greva do të rrisë presionin ndaj Aleksis Cipras, liderit që e drejtoi partinë Syriza së pari në pushtet , dhe pastaj në rizgjedhje duke ngritur flamujt e fshirjes së masave të kursimit.
Shkollat., spitalet, bankat, muzeumet, vendet arkeologjike, farmacitë, dhe shërbimet publike janë të gjitha të mbyllura në 24 orët e ardhshme këtë të enjte në Greqi. Greva ka prekur edhe fluturimet, ku do të ketë ndërprerje, por edhe tragetet që do të ngecin në porte pasi stafi do të ndërpresë punën.
“Presim një pjesëmarrje të gjerë në këtë grevë të parë masive”, shprehet Petros Constantinou, anëtar i grupit antikapitalist me shumë ndikim në Greqi, Antarsya. “Qeveria do të vendoset nën presion të dyfishtë, nga lart prej kreditorëve dhe nga poshtë, prej popullit dhe zemërimi ynë do të jetë i pandalshëm, nuk do të njohë kufij”, premton ai.
Greva e përgjithshme, e 41 që është thirrur nga sindikatata që kur kombi grek i zhytur në borxhe hyri në krizë dhe iu afrua falimentimit të shtetit në vitin 2010, do të shtojë presionin ndaj Cipras. Të hënën, kreditorët e eurozonës refuzuan të shpenzojnë 2 miliardë euro si fond shpëtimi për Greqinë duke nxjerrë si shkak dështimin në përforcimin e reformave.
Zgjedhjet e parakohshme në shtator, nxorrën fitues Ciprasin për një mandat të dytë. Në këtë fushatë, ai premtoi të zbatojë politikat që dikur i kishte kundërshtuar me forcë, në këmbim të paketës trevjeçare të shpëtimit financiar me vlerë 86 miliardë euro. Pas debateve të shumta me kreditorët, Cipras deklaroi se nuk besonte as vetë në disa prej kushteve që kishte pranuar për paketën e tretë të shpëtimit.
Partia e Cipras është në pushtet përsëri, por nuk ka asnjë rrugë pa dhimbje që do ta shëronte Greqinë nga situata katastrofike ku e gjen veten edhe pas vitesh të tëra masa kursimi dhe shkurtimesh.
Vetë përfaqësuesit e Syrizas, përkundër akuzave se e kanë tjetërsuar identitetin majtist të partisë, thonë se partia ka mbetur besnike ndaj rrënjëve të saj në ideologjinë e majtë. “Ne i pranuan masat e kursimit nën presion”, thotë deputeti Christos Simorelis. “Në Syriza, ne vazhdojnë të shohim partinë si një gjë, dhe qeverinë si një gjë tjetër”.
Cipras që ka bashkuar forcat në koalicion me Grekët e Pavarur, një parti populiste e krahut të djathtë, tashmë ka kaluar në parlament draftin e reformave. Një paketë e dytë masash që shihet si vendimtare për lëvrimin e 10 miliardë eurove që do të shkojnë për rikapitalizimin e bankave, pritet të kalojë në javët e ardhshme.
Perspektiva e humbjes së shtëpive për grekët që nuk munden të paguajnë këstet e kredive, do të shtojë një element ndezës në klimën që edhe kështu ndodhet në pikën e vlimit.
Përgatiti: Juli Prifti- /tesheshi.com/
