Më anë të një letre, Aleanca e Grave Deputete i kërkon kryetarit të Kuvendit, Gramoz Ruçi, që të ndëshkojë ata deputetë apo punonjës sigurie, që sipas kësaj aleance kanë ushtruar dhunë ndaj dy deputeteve vajza, Kejdi Mehmetaj dhe Floida Kërpaçi. Pra, bëhet fjalë për ditën kur u zgjodh Kryeprokurorja e përkohshme, e ku elementi femër në LSI ishte në krye të aksionit opozitar për ta kundërshtuar zgjedhjen, duke përdorur dhe metoda vetëvendosëse, siç ishte hedhja e tymueseve. Krahas kësaj, vetë znj. Kryemadhi ndërmorri një hap ekstrem duke hequr një çizme nga këmbët e lëshuar atë drejt kryeministrit Rama, shoqëruar me të shara tipike mashkullore. Megjthatë, ato e shohin ndryshe të vërtetën e asaj dite.
“Ju, në cilësinë e Kryetarit të Kuvendit dhe vetë Kreu i mazhorancës Edi Rama, jo vetëm nuk u distancuat nga dhuna apo nuk morët masa ndaj saj, por, nëpërmjet tolerancës dhe heshtjes tuaj, treguat se pas këtyre akteve dhe nixitës e përkrahës të tyre jeni pikërisht ju”, thuhet në letrën drejtuar Ruçit.
“Kjo provoi edhe njëherë se dhuna ndaj grave është fenomen që jo vetëm nuk luftohet nga maxhoranca juaj, por nxitës i saj është vetë kreu i qeverisë, Edi Rama”, thuhet më tej në letër, e ku në finale kërkohet që:
“Në cilësinë e deputeteve të Kuvendit të Shqipërisë, anëtare të Aleancës së Grave Deputete, dënojmë me forcë këto akte dhune, duke kërkuar nga ana juaj, marrjen e menjëhershme të masave për të dënuar maksimalisht dhe për të vënë përpara përgjegjësisë penale dhe administrativ, deputetët burra dhe punonjësit e Policisë së Shtetit, që ushtruan akte dhune ndaj grave deputete, si dhe vetë nxitësin e këtyre akteve, Edi Ramën. Në të kundërt, nëpërmjet mosveprimit tuaj, ju do të zhbënit këtë angazhim konsensual që në ditët e para të miratimit të tij, duke treguar, edhe në këtë rast, se mbështetja ndaj Rezolutës së propozuar nga opozita ishte një akt fasadë”, thuhet pra në letrën e Aleancës së Grave Deputete. /tesheshi.com/
