Gratë e LSI-së u mblodhën këtë të dielë në Gjirokastër, atje ku dhe e drejtojnë këtë qytet me një kryebashkiake grua, Zamira Ramin. Konventa e tyre pati për kryefjalë atë çfarë tha, e hodhi në fakt në tregun politik, deputetja Monika Kryemadhi, Ilirica siç do thoshin në këtë rast dibranët nga është dhe vetë znj. Kryemadhi, duke qenë se ajo përcjëllë dhe mesazhet e bashkëshortit të saj si një dyshe edhe politike e pandarë.
Sipas asaj çfarë tha Kryemadhi, “Shqipëria ka nevojë për një parti të vërtetë të majtë”, duke aluduar se vetëm LSI mund të jetë e tillë.
“Politika ndonjëherë është shumë e egër por ndonjëherë në momente të caktuara njeriu merr edhe vendime shumë të rëndësishme për jetën. Një nga ato vendime për mua ishte dhe krijimi i LSI-së, një parti e re me disa vlera që ne mendojmë dhe besojmë se LSI duke pasur si bashkëformuese Lëvizjen Rinore për Integrim dhe Lëvizjen e Gruas për Integrim do t’i çojë më tutje. Do t’i çojë më tutje sepse Shqipëria ka nevojë për një parti të vërtetë të majtë e cila përfshin dhe përfaqëson shtresat e mesme dhe atë shtresë që është shumica e popullit shqiptar. Ne kemi nevojë për një largim nga politika e konfliktit. Kemi nevojë për paqe shpirtërore me njëri-tjetrin sepse në fund të fundit, të gjithë provizor jemi në politikë, por e vetmja gjë që nuk është provizore është ky popull, këta njerëz , që e shikojnë të ardhmen e tyre në Shqipëri dhe besojnë se ky vend do të bëhet”, tha Kryemadhi, pas fjalëve të së cilës lexohet një tjetër tentim për sfidim i PS-së së Ramës. Tashmë, LSI po lufton drejt zbehjes së partisë-mëmë prej nga dhe ajo erdhi, gjithnjë me synimin për t’u bërë forca e parë më vend. /tesheshi.com/
