Nga Blendi Gashi
Gratë deputete, si rrallë herë më parë kanë ngritur në seancën e sotme një varg problematikash në Kuvend, kryesisht për komunat nga ato vijnë, por jo vetëm, duke qenë më të zëshme se burrat.
Problematikat e ngritura janë më të ndryshme, si: vrasja e grave nga burrat e tyre dhe mos reagimi i shtetit, cilësia e dobët e detergjenteve që dëmton shëndetin e qytetarëve, mos reagimi i institucioneve për dëmtimin e xhamisë dhe shkollës nga një serb në Llabjan të Novobërdës, për moskompensim të fermerëve, për humbjen e milionave përmes arbitrazhit e tema tjera.
“Vrasja e grave nga burrat e tyre”
Deputetja e LDK-së, Vjosa Osmani ngriti çështjen e vrasjes së Zejnepe Berishës dhe shumë femrave të tjera që janë vrarë nga bashkëshortët e tyre.
Ajo tha se nëse nuk ka reagim nga shtetit për këto çështje ku të mbrohet jeta e gruas atëherë këto nuk do të jenë as rastet e fundit.
“Zejnepja sikurse edhe Diana Kastrati e shumë të tjera kishin kërkuar mbrojtje nga shteti dhjetëra herë e shteti asnjëherë nuk i ka dal në mbrojtje. Nuk ka arsyetim për dhunë ndaj bashkëshortit e aq më pak para fëmijëve. Mos reagimi ynë si Kuvend dhe si shoqëri do të lejojë ndërhyrje të mëtejmë në drejtësi”, deklaroi Osmani.
“Detergjentet po dëmtojnë shëndetin e qytetarëve”
Deputetja e PDK-së, Selvije Halimi ngriti çështjen e problemit të detergjenteve, të cilat tha se po dëmtojnë shëndetin e qytetarëve tonë.
Ajo tha se po flet në emër të disa qytetarëve të cilët kanë ngritur këtë shqetësim.
Halimi kërkoi nga qeveria që t’i kontrollojë detergjentet pluhur dhe ato të aromatizuara se a i përmbajnë përmbajtjet e kërkuara.
“Mos reagimi i institucioneve për dëmtimin e xhamisë nga serbi”
Labinotë Demi-Murtezaj nga Partia Drejtësisë, ka ngritur shqetësime për sulmin e xhamisë në Novobërd nga një qytetarë serb.
Ajo ka thënë se nëse do kishte ndodhur nga qytetarët shqiptarë një sulm i tillë atëherë institucionet tona do të reagonin.
Vlen të theksohet se përvëç saj, askush tjetër nga deputetët në sallën e Kuvendit, nuk kanë reaguar.
“Qeveria mashtroi fermerët e Dukagjinit”
Deputetja e AAK-së, Teuta Haxhiu ka shprehur brengën e fermerëve të rajonit për moskompensimin e premtuar nga qeveria për humbjen e kafshëve nga sëmundja “gungore” që i kishte prekur gjedhet në gjithë Kosovën.
“Vetëm në komunën e Deçanit, banorët humbën 196 kafshë nga kjo sëmundje. Qeveria kishte premtuar për secilën kafshë nga një mijë euro dhe kurrë nuk u kompensuan. Nuk është pak që familjet kanë pasur një burim jetese për shkak se kanë investu nga buxheti i familjes për të ngritur fermat e tyre, qeveria i la pa kujdesje dhe asnjëherë nuk i kompensoj”, tha Haxhiu, e cila përmendi disa nga fshatrat që kanë pësuar nga kjo sëmundje e kafshëve.
Deputetja e NISMA-s, Shukrije Bytyqi ka ngritur shqetësimin e banorëve të Malishevës pas kalimit të shumicës së institucioneve komunale, në regjionin e Gjakovës.
Ajo ka thënë se qytetarët kanë bërë kërkesë në komunë që të nisin procedurat për rikthim nën regjionin e Prizrenit, aty ku me mijëra vite, banorët e kësaj rrethina janë të lidhur në çdo formë.
Kadriu flet për vendimet e arbitrazhit, Bajrami “thumbon” presidentin
Deputetja e pavarur Margarita Kadriu, ka folur për humbjet që ka pësuar shteti nga vendimet e arbitrazhit.
Ajo ka kërkuar nga institucionet e drejtësisë t’i hetojnë zhvatësit e buxhetit të shtetit.
“Përderisa klasa politike kosovare janë duke u marrë me njëri- tjetrin, nga një shteg i lënë hapur shumë vjet më parë për goditje ndaj buxhetit të shtetit, shteti pësoi humbjen e madhe të radhës në Gjykatën e Arbitrazhit. Siç shihet, tanimë po ikin edhe gati 40 milionë euro të tjera përmes Arbitrazhit! Para më shumë se 8 muajsh, pikërisht nga kjo foltore, e ngrita alarmin para qytetarëve, Qeverisë dhe deputetëve kolegë, se buxheti i taksapaguesve kosovarë po rrezikohet nga një skeme e kundërligjshme, kërcënuese, edhe atë për afro 450 milionë euro, përfshirë edhe shpenzimet e mbrojtjes. A do të mbajë ndonjëherë dikush në këtë shtet, jo vetëm përgjegjësi politike, por edhe juridike e penale për këto zhvatje që po i bëhen buxhetit të taksapaguesve kosovarë?!!!”, tha ajo.
Kadriu tha se është taksapaguesi i varfër ai, që e paguan faturën e çdo dështimi, ndonëse do të duhej të kishim një llogaridhënie konkrete të zyrtarëve përgjegjës pas një hetimi serioz të Prokurorisë Speciale të Shtetit.
“Qeveria të kërkojë nga Prokuroria që menjëherë të fillojë hetimin për të verifikuar nëse zyrtarët e përfshirë në këto procedura të prokurimit kanë vepruar në përputhje me ligjin dhe për këtë të njoftojë me prioritet dhe shpejtësi Kuvendin e Republikës së Kosovës”, tha Kadriu.
Kurse deputetja e NISMA-s, Valdete Bajrami ka hedhur akuzar të ashpëra në drejtim të presidentin Thaçi për iniciativat e tij që, siç thotë ajo, po e dëmtojnë të ardhmen e shtetit.
Ajo gjatë fjalimit në Kuvend tha se tashmë është koha të shkohet në zgjedhje të parakohshme.
“Nuk jeni të vetmit që po dëmtoni të ardhmen e shtetit pasi këtu kontribut të madh po jep edhe Thaçi. Iniciativa si ajo e reformës zgjedhore, ajo e ushtrisë ndërsa tani me padinë për gjenocid ai po luan me të ardhmen e shtetit”, u shpreh Bajrami.
Ajo tha se deklarimi i presidentit se në Kosovë nuk ka pasur spastrim etnik por përpjekje për spastrim, siç u shpreh ajo, do t’i kushtojnë Kosovës dhe të ardhmes sonë.
“Të gjithë e dinë se kush ka kryer spastrim etnik dhe se çdo gabim të Thaçit, Serbia do ta përdorë në favor të vetin”, tha Bajrami. /tesheshi.com/
