Prej kohësh ka zëra që e lidhin 23-vjeçarin me një kalim në kampionatin anglez, duke pretenduar se Arsenali është i tërhequr nga ideja për ta bërë të tijin lojtarin.
Me një rol thelbësor në ekipin gjerman ku luan, te Borusia e Mynshegladbahut, Granit Xhaka pohon se në klubin e tij nuk ka ardhur ende një ofertë për të.
“E vetmja gjë që mund të them është se jam i lumtur këtu,” thotë Xhaka, duke iu referuar klubit gjerman ku ai luan. “Në këtë moment nuk ka asnjë ofertë.”
Me Borusian e Mynshegladbahut që renditet në vend të katërt në Bundesligë një javë përpara përfundimit të kampionatit, lojtari që luan për kombëtaren zviceriane pohon se as i ka vajtur në mendje një transferim.
“Për të qenë i sinqertë, as e kam çuar në mendje në javët e shkuara. Dhe këtë mund ta shihni në fushë.”
“Nëse vjen diçka, do të ulemi me gjasa dhe do të vendosim se çfarë do të ndodhë,” ka deklaruar një prej lojtarëve më të dalluar të Borusias së Mynshegladbahut.
Granit Xhaka gjendet te ekipi gjerman që në vitin 2012, kur u transferua nga Bazeli. Kontrata e tij, së bashku me një shtyrje njëvjeçare, përfundon në 2020-ën. Ai ka debutuar në përfaqësuesen zviceriane në qershor të 2011-ës, me të cilën ka luajtur 39 ndeshje e ka shënuar gjashtë gola. Ndryshe tij, i vëllai, Taulant Xhaka, luan për kombëtaren shqiptare. /tesheshi.com/
