Në krye të Kuvendit të ri që doli nga zgjedhjet e 25 Qershorit mund të vijë një nga deputetët më të vjetër të parlamentit shqipar, socialisti Gramoz Ruçi.
Vetë kryeministri Edi Rama e ka pohuar këtë gjatë një interviste tek Top-story.
“Gramoz Ruci, kryetari i ri Parlamentit? Për mua 100 përqind po. Tani shpresoj që të mos më marrë në telefon e të më thotë pse s’më pyete mua”, u shpreh Rama.
Nëse do të ndodhë që detyra e kryetarit të Kuvendit do të shënojë edhe detyrën e parë publike për Ruçin që kur në vend u vendos sistemi demokratik.
Asnjëherë më parë gjatë 27 viteve që ka qenë deputet dhe në postin e dytë më të lartë në Partinë Socialiste, si sekretar i përgjithshëm dhe kryetar i grupit parlamentar, Ruçi nuk ka synuar për ndonjë post publik si; ministër apo kryetar Kuvendi.
Besohet se ka qenë ai vetë që ka zgjedhur të mbajë këtë profil për shkak të kaluarës së tij, pasi shërbeu si ministri i fundit i Brendshëm i regjimit komunist në kapërcyell të zhvillimeve të mëdha që sollën dhe rrëzimin e atij regjimi, pikërisht në vitin 1990.
Ka shumë gjasa që edhe këtë herë ai të mos pranojë detyrën e lartë që ka menduar Rama për të, por nëse pranon atëherë kjo mund të jetë e lidhur me një arsye të fortë; për të balancuar autoritetin që pritet të ketë presidenti i ardhshëm, Ilir Meta, i cili nga aleat me Ramën tani gjendet në llogoren kundërshtare me partinë e tij në opozitë.
Vetëm një personalitet politik si Ruçi do t’i garantonte Ramës një balancim pushtetesh në një parashikim të mundshëm që do ta vendoste Metën në pozitat e një presidenti opozitar ndaj mazhorancës së re socialiste.
Të kujtojmë këtu që akoma pa marrë detyrën e kreut të shtetit Meta ka paralajmëruar se mund të mos e dekretojë kryeministrin dhe qeverinë e re nëse del nga zgjedhjet të manipuluara. Dhe e para gjë që partia që ai drejtori për 13 vjet, LSI, ka bërë pas zgjedhjeve ka qenë kontestimi i rezultatit duke akuzuar Partinë Socialiste se ka manipuluar rezultatin me anë të shit-blerjes së votës.
Ruçi ishte ai që u përball me Metën drejtpërdrejt që kur i “tërhoqi veshin” që të pranonte Presidencën dhe të mos çonte vendin në krizë në muajin Prill, edhe gjatë fushatës kur i kujtoi se gjuha që po përdorte nuk i kishte hije një presidenti, si një paralajmërim se mund edhe të bllokohej betimi i tij si president.
Po kush është Gramoz Ruçi dhe pse Rama e kërkon t’a ketë kryeparlamentar?!
Në mitingun e fitores së PS-së Rama bëri një falenderim të veçantë me “zemër në dorë” për Ruçin. “E çuam të nëntin në listë dhe erdhi vetë i 10-i”– tha Rama duke kujtuar pozitën jo të favorshme që socialisti i vjetër kishte në listën e kandidatëve në qarkun Fier, por ia doli të fitonte.
Ruçi ka qenë një nga shtyllat e fushatës së PS-së, një organizator perfekt i partisë, të cilën ai e njeh me dhëmbë e dhëmballë që prej vitit 1991.
Një protagonist i të gjitha zhvillimeve të brendshme të kësaj partie, ai cilësohet nga socialistët si “shtylla e partisë”. Të dy kryetarët e PS-së, Fatos Nano e Edi Rama, e kanë pasur atë mbështetjen kryesore.
Që në momentin kur Rama erdhi në selinë rozë e ka ndryshuar rrënjëzisht atë parti duke nisur nga simbolet deri tek njerëzit, përveç Ruçit, të cilin nuk e ceku kurrë, përkundrazi e konsideroi si krahun e djathtë, jo vetëm në parti, por edhe në grupin parlamentar.
Ruçi është trashëgimia e vetme direkte nga Partia e Punës në Partinë Socialiste.
Ai u emërua Sekretar i parë Partisë së Punës i rrethit të Tepelenës në vitin 1988, dhe në vitin 1990 ai u emërua Ministër i Brendshëm, post që e mbajti vetëm 2 muaj e gjysëm.
Por dhe pse në pak kohë ministër ai u akuzua në atë kohë për ngjarjen e 2 Prillit në Shkodër, kur forcat policore qëlluan ndaj demostruesve dhe pati 4 të vdekur, 81 të plagosur.
Ruçi ka drejtuar seancën e famshme të kongresit të fundit të PPSH-së në 1991-in, ku u rrëzua ideologjia komuniste dhe u hodhën bazat e ndërtimit të partisë së re Socialiste. Në të gjithë historinë e kësaj partie ka pasur rol të fortë dhe ndikim në animin e ngjarjeve.
Në vitin 2009 kur PS-ja ishte në opozitë dhe kryetarin e kishte jashtë Kuvendit Ruçi mori detyrën e kreut të grupit parlamentar duke u përballur në Kuvend me Sali Berishën. Këtë detyrë e mbajti edhe 4 vitet e PS-së në pushtet.
Pas fitores së mandatit të dytë, mesa duket Rama kërkon t’a shpërblejë besnikun e tij të vjetër dhe ta ngjisë “një shkallë” më lart tij në Kuvend, duke i dhënë mundësinë që të mbajë detyrën më të lartë parlamentare, atë të kryeut të Kuvendit./tesheshi.com/
