Vjedhjet dhe grabitjet e shumta që po ndodhin së fundi, Partia Demokratike i sheh si triumf i krimit. Për partinë më të madhe opozitare, ajo që po ndodh është se krimi po fiton përditë terren ndërkohë që rendi bie. Kreu i departamentit të Rendit dhe Sigurisë në selinë blu, Enkelejd Alibeaj, e denoncoi këtë situatë duke iu referuar edhe tre grabitjeve me armë të ndodhur këtë të hënë.
“Tre grabitje me armë e me maska brenda 4 orëve, është mënyra më e keqe për të nisur një javë në Shqipëri. Ngjarje të rënda, që tregojnë se çdo ditë e më shumë krimi fiton terren, dhe rendi bie. Në mes të ditës, në Tiranë, Korçë dhe Fier, maskat ia kanë dalë të godasin, të marrin paratë e të zhduken në drejtim të paditur. Këto kanë qenë kohë të favorshme për krimin. Krimi sjell krim, dhe kur qeveris me krimin, kur jep garanci e letra rekomandimi për bandat, atëherë i jep krahë grabitësve, trafikantëve, maskave”, tha Alibeaj.
Ndërkohë, reagimeve të tilla qeveria u përgjigjet zakonisht me shifra, ngjashëm si në rastin e kultivimit të hashashit. Por perceptimi publik, aq më tepër kur vidhen banka në mes të ditës, madje dhe në qendër të qyteteve të mëdha, është se krimi jo vetëm nuk është zbrapsur, por ka fituar akoma dhe më shumë terren. /tesheshi.com/
