Ka reaguar policia e shtetit ndaj një sërë raportimesh mediatike, sipas së cilave ka patur dekonsipirim përgjatë hetimeve për grabitjen spektakolare të ndodhur tre javë më parë në Rinas. Në një deklaratë për shtyp thuhet se:
“Policia e Shtetit ka angazhuar specialistët e saj më të mirë dhe në bashkëpunim me Prokurorinë po vijon hetimin e pandërprerë për zbardhjen dhe vënien para përgjegjësisë ligjore të autorëve të grabitjes së vlerave monetare në Aeroportin “Nënë Tereza” në Rinas. Nisur nga disa shkrime në media, Policia e Shtetit konfirmon se nuk ka asnjë hetim për dekonspirim të operacioneve policore në kuadër të këtij hetimi, ashtu siç janë të pavërteta e thjesht shpifje, pretendimet për veprime të pasakta nga ana e policisë. Çdo veprim i policisë është pjesë e një plani hetimor të detajuar e të koordinuar me të gjitha strukturat përkatëse. Për shkak të natyrës së hetimit, policia nuk mund të japë më shumë detaje për publikun, por fton këdo që ka informacion në lidhje me autorët të bëhet bashkëpunues dhe të ndihmojë autoritetet.”
E megjithatë fakt është se deri më tani, policia shqiptare ka dështuar në zbulimin e rasteve të vjedhjeve të bankave, ndërkohë që koha kalon dhe nuk ka ende asnjë shenjë për zbulimin e mundshëm të autorëve të grabitjes spektakolare në Rinas. Por nuk dihet nëse kjo ndodh për për paaftësi apo për dekonspirim. /tesheshi.com/
