Ministrja e Integrimit Klajda Gjosha, një ndër eksponentet e LSI-së, ka reaguar ndaj shkarkimeve të furishme që po bëhen në administratë, nga ana e “teknikëve” të PD-së në qeveri, ku të ndëshkuarit kryesorë janë ata që vijnë nga partia e Ilir Metës. Për të qenë sa më parimore, në raport dhe me postin që mban, Gjosha është shprehur se shkarkimet në radhë të parë po dëmtojnë procesin e integrimit.
“Është për të ardhur keq që një reformë madhore për procesin e integrimit europian të vendit po zhbëhet çdo sekondë, duke shkaktuar jo vetëm një shpërqëndrim të detyrave dhe përgjegjësive që ka administrata, por duke u shoqëruar gjithashtu me mosrespektim të thellë të procedurave ligjore për shkarkimin e çdo punonjësi nga detyra.
Procesi i integrimit është i qytetarëve, ndaj sot më duhet t’i qëndroj përkrah të gjithë atyre që punojnë me përkushtim për këtë proces. Është njëra anë të ndëshkosh një punonjës të administratës për pjesëmarrje në veprimtari politike dhe është një gjë komplet tjetër të mos respektosh procedurat ligjore për ta liruar atë nga detyra.
Çdo punonjës ka të drejtën e tij të njoftohet për nisjen e procedurave të shkarkimit bazuar mbi faktet, ashtu sikurse ka të drejtën që i jep ligji për të dhënë provat dhe faktet që mund të kundërshtojnë këtë vendim.
Unë kam bindjen se shumë prej tyre do të fitojnë betejën e tyre gjyqësore, duke marrë dëmshpërblimin e merituar, por në të njëjtën kohë mendja më shkon te qytetarët e thjeshtë që do detyrohen të paguajnë këtë dëmshpërblim me taksat e tyre, nga xhepi i tyre. Do detyrohen të paguajnë inatet dhe marrëveshjet e politikës dhe fatkeqësisht edhe padijet e atyre që drejtojnë institucionet tona.
Mungesa e transparencës ndaj qytetarëve, mos respektimi i ligjit dhe vendosja e prioriteteve partiake përpara prioritetit numër një që mbetet qytetari, janë kritere që e kanë penguar Shqipërinë të ecë në rrugën e saj europiane. Uroj të mos ndodh kështu edhe këtë herë, kur jemi fare pranë çeljes së negociatave të vendit!”, shkruan ministrja Gjosha në një status në FB.
Kjo është një situatë paradoksale, pasi shkarkimet ndërrmeren nga kolegë të saj në kabinetin Rama, mirëpo me të cilët nuk është përballur për asnjë çast. Kjo, pasi që nga futja e teknikëve të PD-së në qeveri, Rama nuk e ka mbledhur më këtë të fundit. Kujtojmë se gjatë orëve të pasdites, LSI ka bërë me dijë hapjen e një procesi gjyqësor për tre ministra teknikë të PD-së, pikërisht për shkarkimet. /tesheshi.com/
