Jorgo ose Gjergji Goro, humbës përballë Fredi Belerit në Himarë, me një grusht votash, thotë se fitorja e rivalit të tij nuk e nderon Himarën.
“Kjo (fitorja e Belerit) nuk e nderon Himarën…”, tha ai, ndërkohë që dhe ai pret vendimin e drejtësisë mbi Belerin. I pyetur nëse do të rikandidojë në rast se Beleri dënohet dhe Himara shkon në zgjedhje të pjesshme, Goro dha një përgjigje të drunjtë.
“Unë jam në krye të detyrës, jam i pranishëm çdo ditë me qytetarët e mi, kam besimin e tyre, kam besimin e partisë, jam në dispozicion të tyre, për çdo gjë që do të vendosin”.
Fitorja e Belerit, me 19 vota, kandiduar nga dyshja Berisha-Meta, ishte ndër zhvillimet më të rënda në politikën shqiptare.
Fredi Beleri, një filogrek, me synime të qarta nacionaliste për ta përfshirë Himarën në projekte helenizuese, mbështetur fort nga Athina zyrtare, përflitet ndërkohë dhe si pjesëmarrës në masakrën e Peshkëpisë në 94-ën në kufirin me Greqinë. /tesheshi.com/
