Presidenti i fundit i Bashkimit Sovjetik, Mihail Gorbaçov, e ka kritikuar sot ashpër vendimin e NATO-s për dislokimin e forcave shtesë në kufijtë lindorë të saj, duke e akuzuar Aleancën se ka “filluar përgatitjet për eskalimin e luftës së ftohtë në luftë të nxehtë”.
“E gjithë retorika që po përdoret në samitin e NATO-s në Varshavë tregon për dëshirën që t’i shpallet luftë Rusisë. Ata vetëm flasin për mbrojtje, ndërkohë që gjatë gjithë kohës po përgatiten për operacione sulmuese,” ka thënë Gorbaçov për agjensinë ruse të lajmeve Interfaks.
Udhëheqësit e NATO-s kanë dhënë dje miratimin, gjatë samitit që po mbahet në kryeqytetin polak, për dërgimin nga katër batalione ndërkombëtare, respektivisht nga 1.000 ushtarë, në Poloni, Lituani, Letoni dhe Estoni, si dhe të brigadës rumuno-bullgare në rajonin e Detit të Zi.
Batalioni ndërkombëtar në Lituani do të udhëhiqet nga Gjermania, ai në Poloni nga SHBA-të, në Estoni nga Britania, dhe në Letoni nga Kanadaja. /tesheshi.com/
