Larg politikës prej vitesh, Mihail Gorbaçov, i fundit udhëheqës i Bashkimit Sovjetik, mbetet përsëri një ndjekës i zhvillimeve botërore.
Edhe pse në moshë të thyer, 85-vjeç, ai nuk ngurron të përcjellë perceptimet e tij mbi situatën globale, siç ka bërë në një shkrim për revistën Time, ku thotë se duket sikur bota po përgatitet për luftë.
“Bota sot është e kapluar nga problemet. Politikëbërësit ngjan të jenë të pështjelluar dhe ta kenë humbur toruan,” ka shkruar fillimisht Mihail Gorbaçov.
Ai e paraqet situatën aktuale në botë si shumë të rrezikshme, duke sjellë në vëmendje militarizimin e politikës dhe garën e armatimeve.
“Por asnjë problem nuk është më urgjent sot se militarizimi i politikës dhe gara e re e armatimit. Ndalimi i kësaj gare rrënuese duhet të jetë përparësia jonë kryesore.”
“Duket sikur bota po përgatitet për luftë”, shkruan Gorbaçov.
“Më shumë trupa, tanke… po sillen në Europë. Armët dhe forcat e NATO-s e të Rusisë që qenë dislokuar në largësi, tani janë vendosur më pranë…”
“Në botën moderne, luftërat duhet të jenë të jashtëligjshme, sepse asnjë prej problemeve globale me të cilat po ndeshemi nuk mund të zgjidhet me luftë, as varfëria, as mjedisi, as emigracioni, as rritja e popullsisë, as pakësimi i burimeve,” nënvizon në artikullin e tij Mihail Gorbaçov. /tesheshi.com/
