Kryetari i Mitovicës Veriore, Goran Rakiç ka deklaruar se hapja e urës kryesore në lumin Ibër në Mitrovicë që lidh dy pjesët e qytetit nuk është në rend dite.
Ai ka thënë se rikonstruktimi i urës po vazhdon. Sipas tij, pos kushteve teknike të papërfunduara, nuk janë krijuar as kushtet e sigurisë.
Rakiç më tej ka thënë se çështja e hapjes së urës është e lidhur drejtpërdrejt me nënshkrimin e memorandumit për kufizimin e Mitrovicës Veriore dhe asaj Jugore.
Kujtojmë se ditë më parë nënkryetari i komunës së Mitrovicës së Jugut, Faruk Mujka deklaroi se autoritetet komunale në Mitrovicën Veriore po e mbajnë peng hapjen e urës.
“Po promovohet një finale e dialogut dhe Rakiçi shpreson ta mbajë peng çështjen e urës që të negocioj edhe një herë kufijtë administrativ. Kufijtë administrativ janë të përcaktuar edhe me pakon e Ahtisarit por edhe me Kushtetutën e Kosovës dhe dihet 4 fshatra në veri të Mitrovicës i takojnë Komunës jugore. Intenca e Rakiqit dhe e strukturave serbe është që kufirin ta zbresin deri te shtrati i lumit Ibër dhe në një mënyrë të jetë edhe një kufi natyror dhe shumë më i lehtë për tu administruar sipas projektit të ardhshëm të Asociacionit të Komunave Serbe”, theksoi Mujka.
Zyra e BE-së në Kosovë poashtu ditë më parë deklaroi për mediat se punimet në urë dhe në atë pjesë janë duke vazhduar dhe punët kanë hyrë në fazën finale, por nuk dhanë datë për hapjen e saj. /tesheshi.com/
