Pas zgjedhjeve presidenciale në Amerikë, webi, e më specifikisht rrjetet sociale janë akuzuar se kanë devijuar informacionet zyrtare duke lejuar lajme të rreme që tentonin të përkrahnin një kandidat në dëm të tjetrit, duke ndikuar në mënyrë të gabuar opinionin e votuesve.
Zuckerberg ka dalë menjëherë në mbrojtje të krijesës së tij duke pohuar se vetëm 1 për qind e lajmeve që kanë qarkulluar në platformën e tij mund të konsiderohen si mashtrime. Megjithatë, kjo polemikë në Amerikë ka marrë tone gjithnjë e më të ndezura, aq sa ka detyruar kompaninë që t’i rishikojë kushtet e përdorimit të sistemit të vet.
Të njëjtën gjë ka vendosur ta bëjë edhe gjiganti Google. Edhe ai ka vendosur të ndërhyjë në mënyrë zyrtare në AdSense, gjeneratorin e famshëm të reklamave. Kushtet e reja do t’u diktohen shumë shpejt sajteve, sidomos atyre që përhapin artikuj fals.
“Që sot e tutje do t’i kufizojmë reklamimet në faqet dizinformojnë apo që fshehin informacionet e tyre,” ka deklaruar një zëdhënës i Google gjatë një prononcimi për Reuters.
Këto masa kanë për qëllim tutelimin e botuesve dhe atyre që punojnë në fushën e gazetarisë, duke ua hequr përfitimet nga reklamat atyre që përhapin informacione të rreme.
Për momentin dy kompanitë nuk kanë sqaruar se si kanë ndërmend të gjurmojnë sajtet që përhapin lajme të rreme e që nuk respektojnë normat e reja. Sigurisht, kjo nuk do të jetë e mundur duke u mbështetur vetëm në sistemet automatike, pasi të vërtetuar autenticitetin e lajmit duhet më shumë se një algoritëm./tesheshi.com/
