Edhe një herë tjetër Napoli nuk arriti të shpallej kampion i Italisë, por më së paku këtë herë ka me çfarë të krenohet. Sulmuesi kryesor i tij, argjentinasi Gonzalo Higuain, apo, ndryshe, Pipita, shkroi emrin në historinë e futbollit italian, duke thyer një rekord 66-vjeçar.
Gunnar Nordahl do të shënonte 35 gola për Milanin në sezonin 1949-1950, një rekord që do të mbante atë për 66 vite si golashënuesin më të mirë të Serisë A, edhe pse shumë yje të futbollit italian apo botëror do të provonin ta thyenin atë.
Rekordi i më shumë golave në një sezon të vetëm i takon tani sulmuesit Gonzalo Higuain, që me tregolëshin e djeshëm shkoi në kuotën e 36 golave. Arritja bëhet akoma më spektakolare po të kihet parasysh fakti se ai u detyrua të mos i luajë tre takime, i dënuar për një karton të kuq.
Napoli fitoi mbrëmë 4-0 ndaj Frosinones, me tre gola të shënuar nga Higuain. Napolitanët mund të kënaqen me kthimin në Champions League, pas një vendi të dytë të ruajtur me fanatizëm, duke ia dalë ta mbajnë pas Romën.
Festa mbrëmë ka qenë e tëra për Higuain-in në “San Paolo”. “Kisha një dëshirë të jashtëzakonshme ta thyeja këtë rekord, dhe dua të falënderoj çdokënd, mbi të gjitha familjen time, stafin, klubin dhe ekipin,” deklaroi 28-vjeçari argjentinas.
Tre vite pasi u transferua nga Reali i Madridit, Higuain arriti të fitojë zemrat e një qyteti të tërë, aq të dashuruar pas futbollit. Napoli duket ta ketë të lidhur me argjentinasit afeksionin në futboll. Në vitet ’90 të shekullit të shkuar ishte Maradona më i dashuri për ta, tani është Higuain.
“Jam aq krenar për këtë rekord; tani mund të festojmë, sepse jemi kthyer në Champions League,” ka shtuar golashënuesi më i mirë i kampionatit italian.
“Jam shumë i lumtur. Ky qytet më ka dhënë dashuri të tillë, më ka bërë të ndjehem gjithmonë i lumtur, dhe jam duke patur një moment të mrekullueshëm në karrierën dhe jetën time.” /tesheshi.com/
