Blendi Gonxhe, ndër ata zyrtarë apo shtetarë shqiptarë që revolucionalizoi Shërbimin e Transportit Rrugor Shqiptar, si në praktikë punë, etikë komunikimi e imazh, ka vendosur të lërë gjurmë dhe në terrene të tjera veprimi, apo vizioni të munguar, siç është ish-kampi famëkeq i Spaçit.
“MEKI(Ministria e Ekonomisë, Kulturës dhe Inovacionit) do të nisë shumë shpejt me rehabilitimin e
ambienteve të godinave të ish-Burgut të Spaçit, duke mos lejuar degradimin e godinave, e duke e kthyer atë në një vend kujtese. Gjithashtu, është menduar dhe realizimi i një muzeu pranë godinave të ish-burgut, ku do të ekspozohen artefaktet e trashëguara për të përkujtuar, për të mos harruar!”, shkruan Gonxhe në një postim, ku si shkak është një ekspozitë e atyshme kujtese, për të cilën ai shkruan:
“Në ekspozitën ‘E Kaluara e Tashme; e cila u ngrit për të qëndruar përgjithmonë në Spaç të Mirditës. 49 portretet e ish të burgosurve politik që janë ende në jetë,
bashkë me rrëfimet e tyre prekëse por edhe të guximshme, janë tashmë të hapura për publikun e kushdo mund të shohë trupëzimin e 49 portreteve në një skulpturë të vetme e cila kthehet në një monument të kujtesës kolektive, pikëtakim dhe pikënisje e procesit zhvillimor shoqëror.
Kultura në kujtesën e saj nuk mbart vetëm bukurinë dhe mirësinë, ajo zhvillohet edhe përkrahë caqeve të errëta të vendimeve të shoqërisë dhe sistemeve politike.
Përgëzojmë për këtë nismë dy djemtë e rinj e të talentuar, Kristian Zara (krijuesi i skulpturave dhe kurator) dhe kuratorin Arnen Sula të cilët përmes artit risollën
rrëfimet rrënqethëse të ish të burgosurve të Spaçit.
Projekti u konceptua dhe realizua nga ‘Tek Bunkeri’, financuar nga Bashkimi Evropian pjesë e programit EU4CULTURE, zbatuar nga UNOPS në partneritet me Ministrinë e Ekonomisë, Kulturës dhe Inovacionit”. /tesheshi.com/
