Gomonet me shqiptarë që ikin, këto që janë bërë lajm së fundi duke kaluar La Manche-in, detin mes Francës dhe Britanisë së Madhe, nuk janë histori e re.
Për gati 5 vite rresht, nga 1998-ta e deri në 2003-in, ato mbusheshin me ikanakë në brigjet e Vlorës, me destinacion brigjet italiane.
Megjithatë, atë kohë, media nuk merrej me ikjet por thjesht me fenomenin “skafist”. Një i tillë u shfaq te Rudina Xhunga, te “Dritare” e saj, duke rrëfyer një përvojë me shumë trauma, tej fitimeve marramendëse.
Leart Sinani provoi të shkoi në Itali me trap përmes detit, nga Vlora në Ankona, por autoritetet italiane e kthyen. Ai iu rikthye detit, vite më pas, por jo më për veten, por të tjerët. Jo më me trap, por gomone.
Një rrëfim i pazakontë, në emisionin Shqip nga Rudina Xhunga, i një skafisti, që flet për vitet e errëta për shqiptarët, të cilët mbushën gomonet, në drejtim të Italisë. Teksa kthehet shumë pas në kohë, Learti përlotet, ndërsa thotë se është dëshmitar i netëve të tmerrit, ndërsa shumë hesape u lanë në det.
“Miqtë tanë që ishin në Itali, na sollën gomone. Kishim gomonet tona. Merrnim 30 deri në 50 mijë dollarë çdo rrugë. Filluam me 1 milionë lireta. Një skaf merrte rreth 30 veta. Kishte kërkesa të jashtëzakonshme atëherë, për të ikur.
Zakonisht iknim me dy-tre gomone bashkë që në rast se kishte ndonjë problem, të rregulloheshim bashkë. Por jo në pak raste kemi humbur shokë, e miq. Kanë humbur në det, janë mbytur. Kemi parë tmerr me sy në ato vite. Jo pak hesape janë larë në det. Unë jam nga Skela e Vlorës, dhe shumë shokë, miq e komshinj të mi, janë mbytur. Edhe janë vrarë. Kishte hesape që duhet të laheshin. E dija që ishte një rrugë e keqe, por gjithmonë rikthehesha. Kthehesha në shtëpi me çantat plot me para.
Më pas u largova gradualisht, pas një fare kohe nga ajo rrugë. E bëra për familjen, nuk doja ta merrja në qafë. Pastaj më largoi jeta vetë, sepse njëri vritej, njëri mbytej. Rënia në atë lek të madh më shumë i çorientoi vlonjatët. Ata mund ta bënin Vlorën New York, por nuk e bënë”, u shpreh Sinani në Dritare TV.
Në fund, Sinani ka një mesazh për të rinjtë, për ata që marrin rrezikun duke kaluar La Manche-in, me gomone.
“Doja t’u thoja shqiptarëve me fëmijë e me gra, të mos e marrin atë rrugë. Është krim i madh. Ne i kemi mbushur fundet e deteve me trupat tanë, pse duhet të vazhdojmë akoma edhe sot në 2022. Unë e di, e kam të qartë jetën në Shqipëri, është e vështirë, por nuk është më e lehtë të përfundosh në fund të La Manche-it”, u shpreh Sinani në Dritare TV.
