Drejtori i Agjencisë për Siguri dhe Informacion (BIA) Aleksandar Vulin njoftoi se po dorëzon dorëheqje të parevokueshme, duke thënë se “SHBA dhe Bashkimi Evropian po e kërkojnë kokën e tij si parakusht për të mos vendosur sanksione ndaj Serbisë”.
Siç ka thënë ai në njoftim, presidenti serb Aleksandar Vuçiç dhe Serbia po përballen me “kërcënime dhe shantazhe që mund të krahasohen vetëm me ultimatumin austro-hungarez të vitit 1914”, transmeton Tanjug.
“Na kërkohet të njohim Kosovën, të largohemi nga Republika Srpska dhe të mos jemi vend dhe komb sovran duke vendosur sanksione ndaj Federatës Ruse. Nëse do të ishim dakord për ta bërë këtë, kërkesa e radhës do të ishte dëbimi i investimeve kineze, varësia e pakushtëzuar teknologjike dhe ekonomike nga Perëndimi, si dhe vazhdimi i shpërbërjes politike dhe territoriale të Serbisë dhe pranimi i vlerave perëndimore në të cilat nuk ka vend për familjen dhe kombin tradicional dhe në fund të fundit as për drejtësinë sociale”, tha Vulin.
“SHBA dhe BE po më kërkojnë kokën time si parakusht për të mos vendosur sanksione ndaj Serbisë. Unë nuk jam shkaktar i shantazheve dhe presioneve ndaj Serbisë dhe ‘botës serbe’, por nuk do ta lejoj veten të jem shkaktar i shantazheve dhe presioneve ndaj Serbisë dhe ‘botës serbe’. Prandaj po paraqes dorëheqjen time të parevokueshme nga posti i drejtorit të BIA-s”, tha Vulin.
Sipas fjalëve të tij, sanksionet e vendosura ndaj tij janë dëshmi e “luftës së tij të vazhdueshme për unitetin e serbëve”.
“Vendosja e sanksioneve kundër Serbisë, për të cilat do të përdorej udhëheqja ime e vazhdueshme në BIA, do të ishte provë e egoizmit tim”, pohoi ai.
“Dorëheqja ime nuk do të ndryshojë politikën e SHBA-së dhe BE-së ndaj Serbisë, por do të ngadalësojë kërkesat dhe shantazhet e reja. Ata nuk morën sanksione kundër Rusisë, nuk morën njohjen serbe të Kosovës, por morën një kokë serbe. Unë refuzoj të bëhem pjesë e histerisë anti-ruse dhe antiserbe për shkak të ndonjë pozicioni”, shtoi ai.
“Kjo është një fitore e vogël për SHBA-në dhe BE-në, por edhe një fitore e madhe për mua sepse dëshmova se për Serbinë dhe popullin serb ia vlen çdo sakrificë”, tha Vulin.
Kujtjmë se kohë më parë, Vulin do cilësohej si “gomar” nga kryeministri Rama, gjatë një replike në distancë mes të dyve. /tesheshi.com/
