Përtej çudisë që ofron futbolli anglez në ditët e ndërrimit të viteve me mungesën e pushimit dhe me ndeshjet e njëpasnjëshme, si në asnjë kampionat tjetër në Europë, nuk mbetet pas ai dhe për surpriza të këndshme.
E nëse rezultatet nuk kanë patur çuditërisht surpriza, në Premier League është parë dje diçka spektakolare. Bëhet fjalë për golin e sulmuesit francez të Arsenalit, Olivier Giroud, të shënuar në takimin ndaj Kristëll Pallasit.
“Topçinjtë” fituan 2-0 dhe u ngjitën në vend të tretë në klasifikimin e kampionatit anglez. Të parin gol e shënoi Giroud në minutën e 17-të, që një top të dhënë jo mirë në zonë e çoi në rrjetë me një gjuajtje të stilit akrep.
“Më duhej ndihma e Zotit për ta shënuar atë gol. Qe paksa me fat, por ishte e vetmja gjë që mund të bëja. Topi ishte pas meje, dhe unë u përpoqa ta godas me thembër. Në atë pozicion nuk mund të bëni asgjë tjetër,” tha Giroud pas ndeshjes.
Trajneri Arsene Venger e çmoi fort golin, të deklaruar si mes pesë gjuajtjeve më të parapëlqyera prej tij gjatë drejtimit dekadësh të Arsenalit.
“Teknikisht nuk është e pamundur, por ju duhet të keni refleksin. Krosimi nuk erdhi në mënyrë ideale, dhe Olivier-i bëri diçka të veçantë,” do të shprehej Venger i emocionuar.
“Ai e shndërroi atë gol në art. Ky do të kujtohet si goli i Zhirusë (Giroud), që askush nuk do ta harrojë.”
Një gol të ngjashëm shënoi pak ditë më parë dhe armeni Mkhitaryan, sulmuesi i Mançester Junajtedit, në përballjen ndaj Sandërlendit. /tesheshi.com/
