Në finalet e basketbollit amerikan janë vënë përballë për të tretin sezon radhazi Golden State Warriors dhe Cleveland Cavaliers. Në fitoret ka barazpeshë, teksa Cleveland Cavaliers është skuadra kampione në fuqi.
Seria e finaleve të këtij sezoni ka nisur para pak orëve në “Oracle Arena” të Oakland-it, ku ritmin e lojës dhe frenat e saj i kanë patur pritësit, që thuajse asnjëherë nuk e panë veten në vështirësi.
Vetëm në dymbëdhjetëminutëshin e parë dhe të dytin loja qe disi e ekuilibruar; ndryshe, më pas pati një dominim total të Golden State Warriors.
Kevin Durant shënoi 38 pikë në fitoren 113-91 të vendasve, ndërkohë që Stephen Curry spikati me gjashtë trepikëshat e tij.
LeBron James qe shënuesi më i mirë për udhëtuesit, me 28 pikë.
Takimi i dytë i serisë së finaleve do të jetë përsëri në Oakland, këtë të dielë. /tesheshi.com/
