Fundjavë ndryshe në futbollin anglez, ku nuk luhen ndeshjet e Premier League-s, por ato të FA Cup-it. Skuadrat më të njohura janë kualifikuar të gjitha, duke mos u kursyer dhe në gola, përjashtuar Liverpool-in, që për dytën herë brenda pak ditësh nxirret jashtë një aktiviteti.
Plot shtatë gola pati në takimin Tottenham – Wycombe Wanderers, të fituar 4-3 nga londinezët pritës. Një fitore që do të vinte në minutat e fundit, pasi miqtë modestë e kishin kryesuar 0-2 pjesën e parë, ndërsa kryesuan edhe njëherë gjer në minutën e 89-të, kur rezultati ishte 2-3. Pikërisht në këtë minutë barazoi Dele Alli, kurse fitorja erdhi nga goli i minutës së 97-të, shënuar nga Heung-Min Son.
Chelsea nuk e diskutoi kualifikimin ndaj Brentford-it, ndaj së cilit fitoi 4-0. Akoma më e thellë qe fitorja e Arsenal-it në transfertë ndaj Southempton-it: 0-5.
U kualifikua në këtë raund të katërt të FA Cup-it dhe Manchester City, që në fushën e Crystal Palace-it fitoi 0-3.
Liverpool-i u mund në “Anfield” nga Wolverhampton Wanderers, duke dalë jashtë këtij aktiviteti siç doli në mesjavë në Kupën e Ligës.
Humbja 1-2 e së shtunës është vetëm kapaku i një janari të errët, të filluar me barazimin 2-2 ndaj Sunderland-it për kampionat në nisje të vitit.
Liverpool-it i ka mbetur të luftojë vetëm në Premier League, ku po ashtu ka dhjetë pikë më pak se Chelsea kryesues.
Mes katër takimeve të sotme është ai mes Manchester United-it dhe Wigan-it. /tesheshi.com/
