Nga gjashtë takimet e javës së 18-të të kampionatit italian të luajtura mbrëmjen e së enjtes, vetëm një prej tyre u mbyll ashtu siç nisi, pa gola, përballja mes Sampdorias dhe Udinezes.
Roma garantoi mbylljen e vitit si fuqia e dytë e Serisë A me një fitore me përmbysje ndaj Kievos. Miqtë kaluan së pari në epërsi, ndërsa Shaarawy barazoi shifrat në fundin e pjesës së parë. Golat e Dzeko-s dhe të Perotti-t në 45 minutat e dyta i dhanë fitoren 3-1 Romës në “Olimpico”.
Me 38 pikë, Roma vjen e dyta në klasifikim pas Juventusit.
Festival golash pati në Firence, ku u ndeshën Fiorentina me Napolin. Një ndeshje me shumë përmbysje ka qenë ajo në “Artemio Franchi”, por pa nxjerrë asnjë fitues.
Napoli kryesonte 1-2 në minutën e 68-të pas golit të Mertens-it, veçse tetë minuta para mbarimit të lojës do ta shihte veten në humbje. Intriga nuk do të mbaronte me kaq. 11-metërshi i kthyer në gol nga Gabbiadini në minutën e 94-t i mundësoi Napolit barazimin 3-3.
Takimi me më shumë gola qe ai mes Kaljarit dhe Sasuolos. Vendasit dukeshin në dëshpërim të plotë pas çerekorëshit të parë të pjesës së dytë, pasi udhëtuesit kryesonin 1-3. Gjithçka u përmbys në 13 minuta, nga e 62-ta e më tej. Kaljari shënoi tre gola, për ta mbyllur tërë sfidën 4-3.
Gol të minutës së fundit ka patur dhe në “Renzo Barbera” të Palermos, ku skuadra vendase është ndeshur me Peskarën.
Kjo përballjes mes ekipesh që luftojnë për mbijetesë ka përfunduar 1-1. Palermo ka udhëhequr që prej pjesës së parë, por një gol me 11-metërsh nga Biraghi në minutën e 93-të i ka dhënë barazimin Peskarës.
Në barazpeshë, pa përmbysje, pa koklavitje rezultati, është zhvilluar sfida Torino – Xhenova, e fituar 1-0 nga pritësit falë golit të Belotti-t në nisje të pjesës së dytë.
Më interesanti takim luhet sot në Doha, ku Juventusi dhe Milani ndeshen për finalen e Superkupës së Italisë. /tesheshi.com/
