Mesfushori i Lestër Sitit është mungesa më e madhe në listën prej 28 lojtarësh të kombëtares së Zvicrës, të bërë të njohur sot. Një listë së cilës do t’i hiqen pesë emra të tjerë në fund të muajit.
Inler ishte kapiteni i zvicerianëve një vit më parë, por tani do të detyrohet ta shohë nga ekrani televiziv Euro 2016-tën. Ai ka luajtur vetëm pesë takime në Premier League këtë sezon me Lestër Sitin, duke e detyruar trajnerin e kombëtares së Zvicrës ta lërë jashtë listës paraprake.
Vladimir Petkovic ka shprehur mërzinë e tij për veprimin e detyruar, duke deklaruar se ndjehej vërtet i brengosur për lënien jashtë listës të një lojtari të madh, të një personaliteti të madh.
Lojtari me origjinë turke është 31 vjeç, e ka luajtur 81 herë për kombëtaren zviceriane. Petkovic ka thirrur në vend të tij një 19-vjeçar, Denis Zakaria-n e Jang Bojsit.
Zvicra gjendet në grupin A në Euro 2016, së bashku me Francën, Shqipërinë dhe Rumaninë.
Të 28 lojtarët zvicerianë të grumbulluar janë këta: Sommer, Buerki, Hitz, Mvogo, Lichtsteiner, Elvedi, Lang, Djourou, Von Bergen, Schaer, Moubandje, Rodriguez, Widmer, Senderos, Behrami, Dzemaili, Fernandes, Frei, Granit Xhaka, Shaqiri, Steffen, Zakaria, Zuffi, Embolo, Seferovic, Mehmedi, Derdiyok, Tarashaj. /tesheshi.com/
