Edhe pse Ilir Meta dha një deklaratë televizive që u duk si mohuese ndaj një koalicioni me PD-në, që në fakt nuk ishte e tillë, LSI i dërgon një sinjal të ri politik Partisë Demokratike përpara protestës së 18 shkurtit, e cila është paralajmëruar si e fortë.
Numri dy i LSI-së, Shezai Rrokaj, ka lëshuar dy mesazhe që konfondonin në mënyrë të hapur qëndrimin e Ilir Metës.
I pari mesazh është ai i dërguar ndaj Edi Ramës, që e ka cilësuar “arrogant dhe të papjekur” dhe mesazhi i dytë është ai që LSI është e gatshme për votimin elektronik.
“Ky koalicion ka ende kohë për të verifikuar arritjet e veta, për të konstatuar edhe atë problematike që nuk është arritur dhe më pas do të ketë një bilanc dhe vendimmarrje të pjekur në mënyrë që shqiptarët të kuptojnë se çfarë ka qenë e mundur për t’u realizuar, jo për shkak se ka qenë e pamundur, por për shkak të papjekurisë politike, të arrogancës dhe shumë problemeve të tjera që lidhen me qeverisjen”.
Kjo frazë e Rrokajt ishte shumë e qartë në lidhje me konsideratën e LSI-së për kryeministrin e tyre. Ata e quajnë “të papjekur dhe arrogant”. Pra në një linjë me PD-në.
Ndërkaq sinjali i dytë, ai për votimin elektronik ishte më i fuqishmi.
“Votimi elektronik nuk është shpikje e LSI-së. Është një model teknik që e zbatojnë të gjitha vendet demokratike si në numërim dhe verifikim. Sa i takon Shqipërisë, ne mbështesim çdo nismë e cila realizon një proces transparent zgjedhor. Asnjëherë s’është vonë për të bërë gjëra të mira. Të ulen të lënë mënjanë hedhjet e ping-pong-ut, hedhjet e dorashkave”, tha nënkryetari i LSI-së.
PD, një nga kërkesat kryesore që ka planifikuar në protestën e 18 shkurtit është pikërisht votimi elektronik.
Ndërkaq, nëse e analizon deklaratën e Ilir Metës tek Eni Vasili për koalicionin me PD-në, ajo nuk mund të quhet një mohim kategorik.
Situata ishte pak a shumë e tillë: Vasili shfaqi një insert ku Lulzim Basha tha se nuk do të ketë koalicion me LSI-në. Dhe Meta u përgjigj menjëherë se nëse Basha nuk do një herë unë nuk dua dy herë.
Pra mund të quhen si teka të dashuruarish si në kohën e qepës, kur ccifti bënte naze përpara se të lidhej.
As PD e as LSI nuk kanë deklarata të qarta se me kë do të bëjnë koalicion para dhe paszgjedhor; apo nwse kanë përcaktuar një platformw politike.
Ç’ka është një shtysë më shumë për dyshimet logjike të një “rimartese” PD-LSI siç e ka shprehur vetë Edi Rama në muajin dhjetor.
Sinjali i dhënë nga Konventa e djeshme e LSI-së së Tiranës, është e disata që duket se puqet me disa nga qëndrimet e PD-së.
Deri tani, në asnjë aktivitet politik të Partisë së Ilir Metës, nuk ka pasur ndonjë deklaratë apo sinjal të kamufluar i cili të lexohet për një bashkim apo dalje në zgjedhje me PS-në, por vetëm e kundërta.
Proverbi që “koha e mirë, duket që në mëngjes”, duket se është bërë pikërisht për këtë marrëdhënie…/tesheshi.com/
