Bashkëthemeluesi i WikiLeaks, Julian Assange pësoi një goditje të shkaktuar nga stresi për shkak të luftës ligjore kundër ekstradimit në SHBA nga burgu britanik Belmarsh, tha e fejuara e tij Stella Morris.
“Assange u diagnostikua me një atak ishemik kalimtar pas një prej apelimeve të tij në Gjykatën e Lartë përmes lidhjes video më 27 tetor”, citohet të ketë thënë Morris nga Russia Today.
Ajo vuri në dukje se Assange kishte një goditje të vogël, të quajtur TIA, e cila konsiderohet një shenjë paralajmëruese e një goditjeje të rëndë dhe kërkon kujdes mjekësor.
Assange që atëherë i është nënshtruar imazhit të rezonancës magnetike dhe tani thuhet se po merr mjekim.
“Juliani po lufton dhe kam frikë se ky incident mund të jetë një pararendës i një sulmi më të madh. Kjo rrit frikën tonë për aftësinë e tij për të mbijetuar sa më gjatë të jetë e mundur,” tha Morris.
Gjykata e Lartë e Mbretërisë së Bashkuar miratoi të premten një kërkesë të SHBA-së për ekstradimin e Assange, e cila më parë ishte bllokuar për shkak të përkeqësimit të shëndetit mendor të tij.
Megjithëse vendimi nuk është përfundimtar dhe mund të apelohet nga ekipi ligjor i Assange, ai e sjell ish-shefin e WikiLeaks një hap më afër një gjyqi në tokën amerikane, ku ai përballet me 175 vjet burg nëse dënohet për spiunazh. /tesheshi.com/
