Vaksina Sputnik V, për të cilën Rusia është kritikuar se s’ka qenë mjaftueshëm transparente, është 91.6 përqind efektive kundër formave simptomatike të COVID-19, sipas rezultateve të botuara të martën në revistën mjekësore The Lancet dhe konfirmuar nga ekspertë të pavarur.
“Prodhimi i Sputnik V është kritikuar për shpejtësinë e tij, dëshirën për të marrë rezultate menjëherë dhe mungesën e transparencës. Por rezultatet e botuara këtu janë të qarta dhe baza shkencore e vaksinës është provuar,” thanë dy ekspertë britanikë, profesorët Ian Jones dhe Polly Roy, në një koment të studimit të Lancet, raportoi AFP.
Kjo “do të thotë që ekziston një tjetër vaksinë në luftën për të zvogëluar incidencën e COVID-19”, thanë këta ekspertë.
Këto rezultate të para të konfirmuara mbi efektivitetin e vaksinës konfirmojnë pretendimet fillestare të Rusisë, të cilat u pritën me mosbesim nga komuniteti shkencor ndërkombëtar këtë vjeshtë.
Ato duket se aktualisht e rendisin Sputnik V në mesin e vaksinave më efektive, së bashku me Pfizer / BioNTech dhe Moderna (rreth 95 përqind), të cilat bazohen në një teknologji tjetër (ARN).
Zbatimi në disa shtete
Javët e fundit, në Evropë janë dëgjuar thirrje që Agjencia Evropiane e Barnave (EMA) të fillojë procesin e miratimit të Sputnik V, i cili tashmë po zbatohet në Rusi dhe në disa vende të tjera, të tilla si Serbi, Argjentinë dhe Algjeri.
Rezultatet e botuara në The Lancet u morën në fazën e fundit, të tretë të provave klinike të vaksinës, në të cilën morën pjesë gati 20,000 subjekte.
Rezultatet tregojnë se Sputnik V zvogëlon rrezikun e infeksionit me formën simptomatike të COVID-19 me 91.6 përqind.
“Kërkimi i mëtejshëm është i nevojshëm për të përcaktuar efektivitetin e vaksinës në raste asimptomatike dhe në transmetimin e sëmundjes,” shton The Lancet.
Sputnik V i Rusisë është një vaksinë me një “vektor viral” dhe bazohet në viruse të tjerë që janë bërë të padëmshëm dhe janë përshtatur për të kontrolluar COVID-19.
Teknika ruse është përdorur gjithashtu me vaksinat AstraZeneca dhe Oxford, të cilat janë 60 për qind të efektshme, tha EMA. /tesheshi.com/
