Siria, Rusia dhe Irani kanë reaguar ashpërsisht ndaj sulmit amerikan të para pak orëve mbi një bazë ajrore në territorin sirian, por shumë vende të tjera e kanë mbështetur atë, duke u shprehur hapur në krah të këtij zhvillimi.
Turqia është mes vendeve të para që ka dhënë mbështetjen për sulmin amerikan. Ka qenë zëvendëskryeministri Numan Kurtulmuş ai që e ka bërë të qartë qëndrimin turk.
“Siç e ka nënvizuar qartë presidenti ynë, nuk duam të dëgjojmë vetëm fjalë, por duam të shohim veprim. Në këtë pikëpamje, sulmi amerikan mbi bazën ushtarake është kuptimplotë. Ne e mirëpresim këtë aksion, por mendojmë se regjimi i Assad-it duhet ndëshkuar plotësisht në sferën ndërkombëtare.”
“Barbarizmi i regjimit të Assad-it duhet të ndalet sa më shpejt të jetë e mundur,” ka nënvizuar Kurtulmuş.
Arabia Saudite ka dhënë po ashtu mbështetje të plotë për sulmin amerikan, duke e përshkruar atë si një vendim kurajoz të presidentit Trump.
“Një burim i përgjegjshëm në Ministrinë e Jashtme shprehu mbështetjen e plotë të Mbretërisë së Arabisë Saudite për operacionet luftarake amerikane mbi objektivat ushtarake në Siri, që erdhën si një reagim ndaj përdorimit nga regjimi sirian të armëve kimike ndaj civilëve të pafajshëm,” lexohet në një deklaratë të përcjellë nga agjencia shtetërore e lajmeve SPA.
Ministri i Jashtëm francez, Jean-Marc Ayrault, tha sot se çfarë ka ngjarë është një paralajmërim për një regjim kriminal.
“Përdorimi i armëve kimike është i tmerrshëm dhe duhet ndëshkuar, sepse është një krim lufte,” kanë qenë fjalët e Ayrault-it.
Mbështetje e fuqishme ka ardhur dhe nga qeveria australiane nëpërmjet kryeministrit të saj, Malcolm Turnbull.
Ai deklaron se sulmi amerikan është një mesazh i fortë për regjimin e Assad-it.
“Ne i mbështesim Shtetet e Bashkuara në këtë veprim të shpejtë.”
Britania sigurisht që ka qenë e para në dhënien e mbështetjes për sulmin raketor.
“Qeveria britanike e mbështet plotësisht veprimin amerikan, që besojmë se ishte një përgjigje e duhur ndaj sulmit barbar me armë kimike të kryer nga regjimi sirian…,” bëri të ditur një zëdhënës i qeverisë. /tesheshi.com/
