Më së paku 20 civilë janë vrarë në orët e vona të së mërkurës pasi avionët e ushtrisë së Esadit kanë goditur një spital në Halep dhe një ndërtesë banimi aty pranë.
Civilë dhe pjesëtarë të personelit mbetën të vdekur prej sulmit ajror mbi spitalin El Kuds dhe ndërtesën e banimit në lagjen Sukkari në lindje të Halepit.
Sulmi i mbrëmshëm ishte i fundit i një serie të intensifikuar gjatë ditëve të fundit. 100 civilë kanë vdekur prej së premtes nga sulmet ajrore e nga bombardimet.
Observatori Sirian për të Drejtat e Njeriut pohoi se sulmet ishin kryer nga avionët e regjimit.
Ndërkohë, i dërguari i OKB-së, Staffan de Mistura, u ka bërë thirrje SHBA-ve dhe Rusisë të ndërhyjnë urgjentisht për të shpëtuar armëpushimin dhe bisedimet e paqes.
“Gjatë 48 orëve të fundit kemi patur një mesatare të një siriani të vrarë çdo 25 minuta, e të një siriani të plagosur në çdo 13 minuta,” ka parashtruar ai.
Duke iu referuar një grupi monitorues, Al Jazeera raporton se të martën u vranë më e pakta 35 njerëz, mes të cilëve tetë fëmijë, në luftimet mes forcave qeveritare dhe kundërshtarëve të regjimit.
Luftimet janë përqendruar më së shumti në Halep, ku rebelët kontrollojnë lindjen e qytetit, e forcat e regjimit pjesën perëndimore. /tesheshi.com/
