Goditen klani i fortë i Kajollëve në Fier, të cilët prej vitesh kontrollojnë thujase çdo gjë në qytetin e madh jugor.
Prokuroria për Krime të Rënda ka vendosur sekuestro preventive për pasuritë e Fatmir Kajollit, krahut të djathtë të Fatmir Mediut në Fier, i cili është dhe anëtar i Këshillit Bashkiak.
Në administratën e kaluar të bashkisë së Fierit, kajollët kishin në pronësi të parin dhe të vetmin parking me koncension në qytet, i cili u merrte para çdo qytetari që pargonte makinën kudo.
Prokuroria dyshon se kjo pasuri është krijuar në bazë të aktivitetit kriminal, për të cilin ai është dënuar në Itali.
Janë sekuestruar gjithsej 2.1 milionë metra katrorë tokë pyll, arë dhe truall në zonën turistike në Fier, përfshirë edhe 1700 metra katrorë ndërtesë. Prokuroria për Krime të Rënda ka kryer verifikimet në bazë të ligjit “Antimafia”, nisur nga referimi i Policisë së Shtetit, dhe ka marrë lejen nga Gjykata për Krime të Rënda për të vendosur sekuestron në pasuritë e paluajtshme, si edhe shoqëritë private të regjistruara në emër të shtetasit Fatmir Kajolli, Majlinda Çuko (Kajolli) dhe Florim Kajolli.
Fatmir Kajolli është dënuar nga Gjykata e Milanos në Itali, në vitin 2001, me 24 vite burg për veprat penale të “trafikimit, prodhimit dhe posedimit të lëndëve narkotike”. Po ashtu, ndaj tij, Gjykata e Romës, në vitin 2000 ka vendosur dënimin me 16 vite burg për veprat penale të “pjesëmarrjes në organizatë kriminale dhe shkelje të ligjit për narkotikët”.
/tesheshi.com/
