Kampioni xhamajkan Usain Bolt mund ta bënte këtë garë vrapi për as më shumë e as më pak se 10 sekonda, por të vraposh 100 metra në moshën 101-vjeçare, nuk është diçka që mund ta bëjnë të gjithë.
Ida Keeling, e cila do të festojë 101-vjetorin e ditëlindjes së saj më 5 maj, ia ka arritur. Më 30 prill, në Filadelfia, në pistën e vrapit ajo ka arritur e fundit në garën për personat mbi 80-vjeç, por ka arritur të thyejë një rekord në kategorinë e saj, duke vrapuar 100 metra për 1 minutë, 17 sekonda e 33 të qindtat.
Ida, e cila është një afroamerikane banuese në Manhattan, sapo ka arritur në finish ka përshëndetur turmën, e cila e priste e entusiazmuar dhe duke brohoritur e duartokitur.
“Ndoshta ia dola që të thyej një rekord edhe falë mbështetjes së publikut. Mësova të mbijetoj e vetme gjatë depresionit. Këshilla ime për të gjithë? Duajeni veten tuaj. Hani për të qenë mirë, jo nëse ju pëlqen apo jo një ushqim. Mos harroni të bëni ushtrime fizike të paktën një herë në ditë”, – ka thënë e moshuara për mikrofonin e NBC. /tesheshi.com/
