Organe të rendit e drejtësisë në Shqipëri janë para një skandali pas lajmit se gjyqtarja e Gjykatës së Lartë, Majlinda Andrea, është larguar nga Shqipëria pak orë para se të merrej vendimi për pezullimin e saj nga detyra, e më pas procedimin penal, e akuzuar për korrupsion.
Dyshohet se procesi ndaj saj është dekonspiruar nga brenda radhëve të prokurorisë, pra ajo është lajmëruar nga dikush për atë që do i ndodhte, gjë që e ka detyruar të lërë Shqipërinë brenda pak orësh, duke u larguar nga porti i Durrësit, shoqëruar nga bashkëshorti, që po ashtu është nën akuzë, pasi ka luajtur rolin ë ndërmjetësit në marrjen e 50 mijë eurove ryshfet për një proces prone.
Sipas burimeve të Top Channel, tashmë është hapur dhe hetimi për dekonspirimin e dosjes së saj, që e bëri të largohej nga Shqipëria.
Ndërkohë, në një status në FB, analisti Ilir Kulla shkruan se gjyqtarja Andrea është emëruar në Gjykatën e Lartë në vitin 2008 me ndërhyrjen direkte të ish-ambasadorit amerikan John Withers. /tesheshi.com/
