Gjyqtarët që paditën ligjet e Vettingut në Gjykatën Kushtetuese kanë kundër klasën politike. Ashtu si kryeministri Rama edhe kreu i opozitës, Basha kanë dalë në mbështetje të reformës në drejtësi duke kundërshtuar përpjekjen e fundit të Unionit dhe Shoqatës së Gjyqtarëve kundër ligjit.
“Nuk e njoh natyrën e padisë, konfirmoj mbështetjen totale të PD për vettingun, për pastrimin e drejtësisë nga gjyqtarët dhe prokurorët e korruptuar e sidomos nga ata me lidhje kriminale. Jemi ne që prej 3 vitesh e gjysmë kemi kërkuar vettingun me qëllim largimin e gjyqtarëve dhe prokurorëve të korruptuar, me qëllim shëndoshjen e sistemit me gjyqtarë e prokurorë që nuk mbrojnë krimin dhe korrupsionin, por u shërbejnë qytetarëve”, deklaroi Basha sot për Top-channel.
Nga ana tjetër Rama ka sulmuar sot gjyqtarët duke u bazuar tek kërkesa e tyre në Kushtetuese.
“Tani shkojnë atje dhe thonë, ‘vettingu dakord, por jo për krimin e organizuar’. Atëherë për çfarë? Se vettingu këto ka, pasuritë dhe lidhjet me krimin. Ke apo s’ke lidhje me krimin, këtë do bëjnë komisionet e vettingut. Këta thonë se këtë s’duhet ta bëni sepse është shkelje e të drejtave të njeriut. Është shkelje e të drejtave të njeriut kur ti si gjykatës ulesh e ha drekë me kriminelë që duhet t’i gjykosh”, tha Rama.
Zbatimi i ligjit të vettingut ishte një nga pikat e marrëveshjes Rama-Basha më 18 maj, por komisionet e Vettingut akoma nuk janë ngritur që të nisë funksionimi i kontrollit për drejtësinë./tesheshi.com/
