Prokurorët spanjollë kanë hedhur poshtë akuzat për korrupsion dhe mashtrim kundër ish-yllit të futbollit të Barcelonës, Neymar dhe të pandehurve të tjerë.
Gjyqi po mbahet në Barcelonë për shkak të parregullsive të dyshuara në lidhje me transferimin e brazilianit në vitin 2013 nga Santos te Barcelona.
Të premten, prokuroria njoftoi “tërheqjen e akuzave ndaj të gjithë të akuzuarve dhe për të gjitha akuzat” me të cilat përballeshin.
Më parë, prokuroria spanjolle kërkoi dënimin me dy vjet burg për Neymar, një lojtar kyç i kombëtares braziliane që do të shkojë në Kupën e Botës në Katar muajin e ardhshëm si favorit.
Neymar, 30 vjeç, tha se nuk i kujtohej nëse ishte përfshirë në negociatat që çuan në marrëveshjen e arritur me Barcelonën në 2011 për transferimin e tij nga klubi brazilian Santos dy vjet më vonë.
Tërheqja e akuzave është kulmi i një sage ligjore të gjatë që rrethon lëvizjen e Neymar në Evropë. Në vitin 2017, Neymar kaloi nga Barcelona te skuadra franceze PSG në një transferim rekord me vlerë 222 milionë euro.
Neymar ishte një nga nëntë të pandehurit në gjyq për akuza të lidhura me korrupsionin, duke përfshirë prindërit e tij dhe firmën e tyre, N and N, e cila menaxhon punët e tij. Në mesin e të pandehurve janë dy ish-presidentët e Barçës, Sandro Rosell dhe Josep Maria Bartomeu, dhe ish-bosi i Santos, Odilio Rodrigues Filho.
Barcelona gjithmonë pretendonte se transferimi kushtonte 57.1 milionë euro, por prokurorët besonin se vlente të paktën 83 milionë euro. Klubi i ka paguar 40 milionë euro kompanisë “N and N”, në pronësi të familjes Neymar dhe 17.1 milionë euro Santos, nga të cilat 6.8 milionë dyshohet se i janë paguar kompanisë së investimeve sportive DIS, në pronësi të rrjetit brazilian të supermarketeve Sonda për të fshehur vlerën e vërtetë të marrëveshjes.
Kompania DIS ka ngritur padinë e saj në të cilën akuzon partnerët e tjerë për marrëveshje të fshehtë në biznes, duke iu grabitur atyre pjesën e vërtetë. /tesheshi.com/
