Në vijim të seancave kundër Emilnao Shullazit dhe të pandehurve të tjerë, sot ka dëshmuar në sallën e gjyqit biznesmeni nga Lushnja, Adriatik Kërçuku.
Ai ka thënë se nuk e njihte personalisht Shullazin, por se një ditë e kishte marrë në telefon një person dhe i ishte prezantuar si ai.
Personi që i kishte thënë se ishte Emiljano Shullazi i kishte kërkuar takim në Tiranë.
“Unë nuk e njoh Emiljano Shullazin. Një ditë të bukur një person më mori në telefon dhe m’u prezantua si Shullazi. Ai më kërkoi të vija ta takoja në Tiranë, por unë nuk pranova”, raporton BË, duke iu referuar dëshmisë së Adriatik Kërçukut. Në vijim ai shtoi se një muaj më pas i është vënë eksploziv te pronat e tij.
Sot dëshmoi edhe vëllai i Kërçukut që është shprehur se nuk ka dijeni për punët e vëllait.
Shpërthimi në biznesin e duraluminit të biznesmenit Kërçuku ndodhi më 25 janar 2016. Kërçuku, rezulton të ketë depozituar një dëshmi në komisariatin e Lushnjës dhe më pas në Drejtorinë e Policisë së Fierit, ku tregonte se në muajin Janar 2016 është telefonuar nga një numër i panjohur duke i kërkuar takim, por ai i është përgjigjur se s’mund të takoheshin pasi atë ditë ndodhej në Durrës.
Sipas dëshmisë së biznesmenit të aluminit, telefonata e panjohur është kryer pas vizitës që katër djem të panjohur kanë kryer në biznesin e tij në autostradë, afër Lushnjës. /tesheshi.com/
