Sot, më 26 korrik, në gjyqin ndaj kardinalit Angelo Becciu për korrupsion, prokurori i Vatikanit i bëri thirrje gjykatës që ta shpallë fajtor atë dikur shumë të fuqishëm të Selisë së Shenjtë dhe ta dënojë me shtatë vjet e tre muaj burg.
Vendimi i gjykatës pritet në fund të vitit, pas pushimit veror dhe seancave të tjera dëgjimore me të dëmtuarit, përfshirë Bankën e Vatikanit.
Është një nga gjyqet më të mëdha në historinë e Vatikanit. Becciu, dikur zëvendëssekretar i shtetit, është kardinali i parë që gjykohet në qytet-shtet.
Kardinali 75-vjeçar dhe nëntë të bashkë-akuzuar të tjerë janë në gjyq për skandalin e investimeve në të cilin paratë e kishës u përdorën për të blerë një vilë në lagjen luksoze londineze të Chelsea, dhe dyshohet se janë paguar disa qindra milionë euro për pronën, komisionet dhe shërbime të tjera.
Prokurori Alessandro Diddi u përpoq të provonte se kardinali dhe të akuzuarit e tij ishin fajtorë për shpërdorim detyre, pastrim parash, mashtrim, përvetësim dhe korrupsion në gjyqin që filloi dy vjet më parë.
Biznesi me humbje me pasuritë e paluajtshme në Londër është bërë ndër të tjera me fondet e Sekretariatit Shtetëror të Selisë së Shenjtë.
Por të gjithë të akuzuarit mohojnë çdo shkelje. /tesheshi.com/
