Pasi një gjykatë saudite dha të hënën disa dënime për vrasjen e gazetarit disident Jamal Khashoggi, kritika të shumta pasuan.
Gjykata dënoi pesë të akuuzuar me 20 vjet burg, ndërsa tre morën dënime nga shtatë deri në 10 vjet burg, njoftoi media saudite. Tetë persona të dënuar për vrasjen, e cila ndodhi në konsullatën saudite në Stamboll, nuk janë identifikuar.
Vendimi u dha pasi djemtë e Khashoggi thanë në maj se ata kishin “falur” vrasësit. Kj u quajt një “parodi e drejtësisë” nga ekspertja e KB, Agnes Callamard.
Khashoggi u zhduk më 2 tetor 2018, kur ishte në konsullatën në Stamboll. Autoritetet turke më vonë njoftuan se ai u vra në atë ndërtesë nga një ekip saudi. Trupi i tij nuk u gjet kurrë.
I gjithë gjyqi u kritikua ashpër nga organizatat e të drejtave të njeriut, të cilat deklaruan se askush nga zyrtarët e lartë ose dikush i dyshuar për urdhërimin e vrasjes nuk u gjet fajtor. Pavarësia e gjyqësorit është vënë gjithashtu në pikëpyetje.
Khalil Jahshan, nga Qendra Arabe në Uashington, tha se zyra e prokurorit njoftoi se “çështja është mbyllur përgjithmonë”.
“Më e rëndësishmja, ku është trupi i Jamal Khashoggi? Me këto verdikte, supozoj se ata zbuluan se çfarë i ndodhi atij. I gjithë verdikti më duket i manipuluar”, tha Jahshan.
Callamard, raportuesja speciale e KB për vrasjet jashtëgjyqësore, masive dhe arbitrare, tha të hënën se gjyqi nuk ishte as i drejtë dhe as transparent, dhe se “çështja e përgjegjësisë së Princit të Kurorës Mohammed bin Salman nuk është adresuar aspak”.
Hatice Cengiz, e fejuara e Khashoggi, gjithashtu kritikoi vendimin në mediat sociale.
“Vendimi i sotëm në Arabinë Saudite është një tallje me drejtësinë. Autoritetet saudite po e mbyllin çështjen pa e ditur bota të vërtetën se kush është përgjegjës për vrasjen e Jamal-it. Kush e planifikoi atë, e urdhëroi atë, ku është trupi? Këto janë pyetjet më të rëndësishme që mbeten plotësisht pa përgjigje” , shkroi ajo në Twitter.
Rami Khouri, nga Universiteti Amerikan i Bejrut, tha se shumë njerëz në të gjithë botën e kanë kritikuar procesin për kundërshtimin e standardeve të pranueshme ndërkombëtare të drejtësisë.
“Pyetja se kush urdhëroi vrasjen është ende një pyetje e madhe. Trashëgimtari i fronit është thirrur dhe është një akuzë shumë e rëndë kur vjen nga KB ose CIA. Shumë pyetje presin përgjigje,” shtoi ai. /tesheshi.com/
