Gjykimi i serbit Darko Tasiqit, i akuzuar për masakrën ndaj bashkëfshatareve të tij shqiptarë në Krushë të Vogël të Rahovecit, ka arritur në fazën përfundimtare.
Tasiq po akuzohet nga Prokuroria Speciale e Kosovës për krime lufte kundër popullatës civile në këtë fshat. Gjykimi po vazhdon pasi të gjithë dëshmitarët e propozuar nga prokurorja Drita Hajdari janë dëgjuar dhe kanë paraqitur dëshmitë e tyre para trupit gjykues.
Prokurorja si provë të këtij rasti kishte të propozuar dokumentarin “Serb genocide against albanians” (Gjenocidi serb kundër shqiptarëve) të gazetarit britanik John Sweeney. Dokumentari ishte shfaqur në Gjykatën e Prizrenit më 13 maj dhe kishte ngjallur emocione te të pranishmit në sallë. Të pranishëm në publik kishin qenë banorë të fshatit Krushë e Vogël, disa prej të cilëve edhe kishin qenë dëshmitarë, duke përfshirë të mbijetuarin e masakrës në këtë fshat të Prizrenit, Bajram Zylfiu.
Zylfiu kishte treguar se nga 109 burrat sa ishin të mbyllur në shtëpinë ku ishte kryer masakra, në fund vetëm 6 kishin mbetur të gjallë. Në dokumentarin e gazetarit britanik, i cili u shikua me propozim të prokurores së Prokurorisë Speciale, shfaqeshin momente kur gratë e Krushës së Vogël bashkë me fëmijët e tyre ishin kthyer në fshat dhe kishin gjetur shtëpitë e braktisura. Po ashtu, ato mësonin për lajmin e hidhur për vdekjen e familjarëve të tyre.
Këto pamje kishin qenë të papërballueshme për banorët e fshatit Krushë e Vogël, që nga salla largoheshin të përlotur. Edhe të tjerë që kishin vazhduar të qëndrojnë në sallë të gjykimit nuk i ndalnin lotët gjatë kohës sa shfaqej dokumentari i gazetarit britanik.
Pos kësaj, prokurorja Hajdari kishte propozuar që ky gazetar të dëgjohet edhe si dëshmitar, eventualisht të ftohet në Gjykatë ose të bëhet dëgjimi i tij si dëshmitar përmes video-lidhjes.
Që nga muaji Maj i vitit 2019, Gjykata e Prizrenit ka tentuar që nëpërmjet Ministrisë së Drejtësisë të arrijë të sigurojë praninë e gazetarit Sweeney.
Në seancën e datës 3 shtator, gjyqtari Artan Sejrani kishte njoftuar se autoritetet angleze kishin kërkuar informata shtesë para se gazetari të dëgjohet si dëshmitar në këtë proces gjyqësor, ku Prokurorja Hajdari këto informata i ka përcjellë për tek autoritetet angleze ashtu siç kishin kërkuar, dhe konsideron se e ka përmbushur obligimin e saj dhe tashmë janë në pritje të përgjigjes nga autoritetet angleze. /tesheshi.com/
