Prishtinë – Gjykata Speciale që pritet të jetësohet së shpejti do të ketë autoritet, gjegjësisht, juridiksion mbi të gjitha gjykatat tjera në Kosovë.
Portali Koha.net ka siguruar Projektligjin për Gjykatën Speciale, ku në mes tjerash thuhet se “1. Dhomat e specializuara kanë juridiksion mbi krimet e parapara në nenet 12 – 16 që kanë të bëjnë me Raportin Marty”.
Projektligji i cili në versionin zyrtar ka titullin “Projektligji për dhomat e specializuara dhe prokurorinë e specializuar”, në pikën e dytë e parasheh që “2. Dhomat e Specializuara po ashtu kanë juridiksion mbi veprat e parapara në kapitullin XXXII, nenet 384-386, 388, 390-407, dhe kapitullin XXXIII nenet 409-411, 415, 417, 419, 421, 423-424 të Kodit Penal të Kosovës i vitit 2012, Ligji 04/L-082, kur ato kanë të bëjnë me procedurat zyrtare dhe zyrtarët e tyre”.
Dhomat e specializuara do të kenë juridiksion mbi krimet në kuadër të juridiksionit lëndor të tyre të cilat janë kryer mes periudhës 1 janar 1998 dhe 31 dhjetor 2000.
Brenda juridiksionit lëndor të tyre, Dhomat e specializuara kanë përparësi mbi të gjitha gjykatat e tjera të Kosovës. Në çdo fazë të hetimeve ose procedurave, Dhomat e specializuara ose prokurori i specializuar mund të urdhërojnë transferimin e procedurës brenda juridiksionit lëndor të tyre nga ndonjë prokuror tjetër ose ndonjë gjykatë tjetër [përveç Gjykatës Kushtetuese] në territorin e Kosovës tek Dhomat e specializuara dhe prokurori i specializuar. Prokurori i shtetit ose gjykata u përcjell Dhomave të specializuara çdo shkresë dhe të gjitha shkresat që i përkasin lëndës së kërkuar. Urdhri i Dhomave të specializuara për transferim është përfundimtar dhe detyrues.
Ky dokument, që pritet të bëhet Ligj për Gjykatën Speciale e lë mundësinë që edhe rastet e gjykuara nga drejtësia vendore, t’i nënshtrohen rigjykimit./TeSheshi.com/
