Shtetasi turk, përkrahës i Gylenit i cili u arrestua të premten në Prizren do të qëndrojë për 40 ditë në paraburgim derisa të vendoset për ekstradimin e tij në Turqi, pasi ai dyshohet për veprën penale “Organizimi dhe pjesëmarrja në grup terrorist”. Këtë vendim e ka marrë sot Gjykata Themelore në Prishtinë e cila ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit kundër të kërkuarit Ugur Toksoy.
“Të kërkuarit U.T., i është caktuar masa e paraburgimit në kohëzgjatje prej 40 (katërdhjetë) ditësh dhe atë duke filluar prej datës 27.10.2017 gjerë me dt. 06.12.2017. I akuzuari U.T, kërkohet për veprën penale Organizimi dhe pjesëmarrja në grup terrorist nga neni 143 par.2 të KPK, sipas Kërkesës së Ministrisë së Drejtësisë së Republikës së Turqisë të datës 16 dhe 19 tetor 2017, për ekstradimin e shtetasit të vet U.T., si dhe nga Gjykata Penale e shkallës së parë nr.2 Hatay, e cila ka nxjerrë Urdhërarrest kundër të cilit në shtetin e Turqisë janë duke u udhëhequr hetimet penale në drejtim të veprës penale Organizata e armatosur nga neni 314 të Kodit Penal të Republikës së Turqisë”, thuhet në njoftimin e Gjykatës.
Gjykata më tej thotë se “ka analizuar të gjitha arsyet për caktimin e paraburgimit kundër të kërkuarit U.T, sepse po të gjendej i kërkuari në liri, i njëjti mund të ikte, të largohet apo të fshihet dhe do të jetë i pakapshëm nga organet e ndjekjes, pasi që i njëjti është shtetas i Republikës së Turqisë dhe kërkohet nga autoritetet e këtij shteti”.
Në njoftim thuhet se pala ka të drejtë ankese kundër këtij vendimi në Gjykatën së Apelit të Kosovës.
Kujtojmë se dy ditë më parë diplomati turk, Mevlut Çavusolu, i tha zv.kryeministrit kosovar Behgjet Pacolli se është e papranueshme që në Kosovë të ketë prani gyleniste në sektorë të ndryshëm. /tesheshi.com/
