Gjykata Kushtetuese ka rrëzuar shtesat e Kodit Penal që u bënë me kërkesë të Ministrit të Brendshëm Saimir Tahiri, për burgime të ashpra ndaj atyre që vendosnin eksplozivë, grabiznin me dhunë apo për plagosje ndaj personit.
Nisma e qeverisë erdhi pas shtimit të rasteve të shpërthimeve me tritol në kryeqytet e për këtë arsye u vendos që për rastet e mbajtjes pa leje të armëve dhe eksplozivit dënimi të shtohet nga 5-8 vjet burgim dhe në rrethana cilësuese nga 15-20 vjet burgim.
Ky ndryshim në Kodin Penal u ankimua nga Gjykata e Apelit Vlorë dhe më 10 dhjetor të këtij viti Gjykata Kushteuese ka shpallur vendimin që rrëzon qeverinë.
Gjykata Kushtetuese ende nuk e ka publikuar vendimin të arsyetuar, por në fund të shqyrtimit të çështjes bën të ditur se shfuqizon ashpërsimin e masave për rastet e mbajtjes pa leje të armëve dhe eksplozivëve, duke i konsideruar ato të papajtueshme me të paktën 4 nene të Kushtetutës, ku parashikohet, ndër të tjera, se “kufizimi i të drejtave dhe lirive të njeriut duhet të jetë në përpjesëtim me gjendjen që ka diktuar atë”.
Pas këtij vendimi çdo person që është dënuar mbi bazën e ndryshimeve që iu bënë Kodit Penal ka të drejtë të kërkojë rigjykim të çështjes. /tesheshi.com/
