Gjykata Kushtetuese e Spanjës ka marrë një vendim ku e lejon emërimin e Carles Puigdemont si president i rajonit të Katalonjës, vetëm nëse ky i fundit do të paraqitet përpara gjykatës dhe të përballet me akuzën e rrëzimit të rendit kushtetues të Mbretërisë.
Sesioni i betimit si president i Katalonjës është parashikuar për datën 30 janar, ndërkohë që Puigdemont ndodhet në ekzil në Belgjikë.
Ai është kandidat i vetëm për kreun e rajonit pas zgjedhjeve të parakohshme që i thirri kryeministri Rajoy, por që nuk sollën asgjë të re.
Koalicioni Junts per Catalunya (JxCat) bën të ditur se kandidati për president do të paraqitet pranë gjykatës dhe do të ndjekë të gjitha rrugët ligjore.
Edhe pse Madridi në tetor ndërmori një represion ndaj partive që ishin për pavarësinë e rajonit më të pasur të vendit, zgjedhësit e Katalonjës votuan me të njëjtin rezultat si në referendum: u dhanë fuqinë partive pro shkëputjes.
Tashmë qeverisë qendrore nuk i ka mbetur rrugë tjetër veçse negociatat për modalitetet e pavarësimit të provincës verilindore të vendit. /tesheshi.com/
