Nga Blendi Gashi
Gjykata Kushtetuese e Kosovës përmes një vendimi ka konfirmuar pronësinë e Manastirit të Deçanit mbi 24 hektarë tokë, e cila për vite të tëra është kontestuar, nga udhëheqja komunale dhe qytetarët.
Ky vendim ka shkaktuar pakënaqësi të mëdha tek komuna e Deçanit dhe Lidhja e Historianëve të këtij qyteti, për çka kanë paralajmëruar protesta të fuqishme në qytetin e tyre dhe në Prishtinë konkretisht para Kushtetueses.
Kryetari Lidhjes së Historianëve të Kosovës, “Ali Hadri” dega në Deçan, Selim Lokaj, duke folur rreth vendimit të Kushtetueses për pronat të cilat, sipas këtij vendimi, mbesin në anën e Manastirit të Deçanit, ka thënë se ky vendim është plotësisht i papranueshëm.
“Për ne si Lidhje e Historianëve dhe si qytetarë është plotësisht e papranueshme. Është kapitullim i një gjykate, e cila më së paku është kushtetuese dhe e Kosovës”, ka thënë Lokaj.
Ai ka thënë se do të reagojnë në të gjitha format e mundshme, duke paralajmëruar protesta në Deçan dhe Prishtinë, para Gjykatës Kushtetuese.
“Protesta do të ketë në vazhdimësi para Gjykatës Kushtetuese, e cila nuk mundet të jetë kurrë kushtetuese. Përgjegjësia nuk do të jetë e jona, por e Gjykatës Kushtetuese”, ka thënë ai, teksa ka shtuar se ka dokument rus nga viti 1912, ku shihet se ato parcela janë në emra të shqiptarëve.
Këtë vendim Lokaj e sheh si të padrejtë, pasi thotë se të gjitha vendimet dhe ligjet e vitit 1987-’99 janë shfuqizuar nga Parlamenti i Kosovës, e kjo është bërë në atë kohë kur i pari i Parlamentit të Serbisë ka qenë Vojsllav Shesheli.
Kryetari i Deçanit: Do ta kundërshtoj fuqishëm vendimin
Edhe kryetari i Deçanit, Rasim Selmnaj, e ka quajtur turp e tradhti vendimin e Gjykatës Kushtetuese për pronat në Deçan.
“Turp e tradhti e Gjykatës Kushtetuese ndaj interesave të vendit e të popullit! Ndërhyrje politike dhe shkelje e ligjit e drejtësisë! Turp! Kurrë ky vendim s’ka me u pranu e as zbatu nga Komuna që unë e drejtoj. Manastiri nuk mund të bëhet pronar i këtyre pronave! Qytetarët e Deçanit dhe unë personalisht do ta kundërshtojmë fuqishëm këtë vendim politik dhe të turpshëm”, ka thënë Selmanaj.
Presidenti Thaçi e përshëndet vendimin e Kushtetueses
Për dallim nga deçanasit që e kundërshtojnë ashpër vendimin, presidenti i vendit, Hashim Thaçi e ka përshëndetur atë nëpërmjet llogarisë së tij në Facebook duke thënë se vendimi i Kushteuteses është i bazar në Kushteutën e vendit dhe Konventën Europiane.
“Vendimi i Gjykatës Kushtetuese rreth pronës kishtare në Deçan është i bazuar në Kushtetutë të Shtetit dhe Konventën Europiane për të Drejtat e Njeriut. Kosova është shtet ligjor ku vendimet gjyqësore respektohen. Prona është e patjetërsueshme, e kujtdo qoftë ajo”, ka shkruar Thaçi.
Ndryshe, banorët e Deçanit dhe zyrtarët komunalë zhvilluan disa protesta në vitin 2013, duke thënë se manastiri është objekt kulti i shqiptarëve e jo i serbëve.
Pakënaqësitë patën kulmuar pas një një vendimi të nxjerrë nga Dhoma e Posaçme e Gjykatës Supreme në Kosovë, i cili thoshte se 24 hektarë tokë, që dy ndërmarrje shoqërore pretendonin se janë pronë e tyre, i mbesin në administrim Manastirit të Deçanit.
Në linkun mëposhtë mund të lexoni vendimin e Kushtetueses për pronat e Manastirit të Deçanit:
