Ahmed Manasra është shpallur sot fajtor nga një gjykatë izraelite për mbajtje thike dhe për vrasje në tentativë.
14-vjeçari është gjykuar për një ngjarje të ndodhur në Jerusalemin Lindor vitin e kaluar. Prokurorët izraelitë kanë pretenduar se Ahmedi bashkë me kushëririn e tij, Hasan Manasra, janë përpjekur t’i qëllojnë me thikë dy izraelitë.
Hasani, 15-vjeç asokohe, u qëllua për vdekje nga forcat izraelite të sigurisë, kurse Ahmedi u godit nga një makinë ndërsa po ikte, duke u plagosur rëndë.
“Djali im nuk u përpoq të qëllonte askënd. Akuzat janë të fabrikuara,” ka thënë i ati i djalit, Salih Manasra. “Verdikti i gjykatës është i padrejtë. Ai nuk duhej për asnjë moment të arrestohej apo të mbahej në burg.”
Gjyqi u zhvillua me dyer të mbyllura për shkak të moshës së të pandehurit.
Mbrojtësi ligjor i djaloshit ende të parritur do të deklaronte se provat tregojnë se ai nuk donte të vriste askënd dhe nuk vrau askënd.
“Ai thjesht kërkonte t’i trembte hebrenjtë, që t’i jepnin fund vrasjes së palestinezëve.”
Seanca gjyqësore për dënimin e Ahmedit 14-vjeçar do të nisë më 11 korrik, siç ka bërë të ditur një zëdhënës i Ministrisë izraelite të Drejtësisë, ndërkohë që prokurori, nga ana e tij, është shprehur se do të kërkojë një dënim të rëndë.
Një 12-vjeçare palestineze nga Bregu Perëndimor, e shpallur po ashtu fajtore nga një gjykatë ushtarake izraelite për vrasje në tentativë dhe e dënuar me katër muaj burg, u lirua në prill. /tesheshi.com/
